Vawiin chawhnu dar 1:30 khan NLUP Implementing Board Conference Hall-ah Pu H. Liansailova, Vice Chairman, Mizoram Planning Board hovin, sawrkar mi pawimawhten Plan Fund kalphung thar a kalpui tum mek chungchang an sawiho.

Pu H. Liansailova chuan, Central sawrkar ah Plan Fund kalphung te tih danglam a nih tak avangin Mizorama thawktuten tluang tak leh kalphung thar anga an thawh theih nan sawihona nei turin inbuatsaih a tul a tih thu a sawi.

Central atanga sum hnar Mizoramin a neihte (Resource Landscape) hriat chian a pawimawhin, Special Plan Assistance (SPA) te, 10 % Gross Budgetary Support for NE Region te, NEC te, Non-lapsable Cental Pool of Resources zir chian a tul thu leh Guidelines zirchian a tul thu kalkhawmte chu hrilhin Pu Liansailova chuan CSS tharah chuan 10 % Flexi Fund a awm tawh avangin, heng hi Head of Department te chuan an chian em em a ngai tih a sawi.

Mizoramah pawh kalphung thar siam tum a niin, resources neihte a tha thei ang berin kalpui leh hlawkpui theih ang bera hman theih nan Plan Fund Sectoral Allocation neih tum a nih chungchang te Pu Liansailova chuan a sawi bawkin thla 3 danah ni tawh lovin, thla 1 danah Central sawrkar duhdan angin monthly expenditure te leh Physical Progress on Central Scheme te thehluh a ngai tawh dawn tih a sawi bawk.

Vawiin meeting ah hian Pu P.L. Thanga, Member and Secretary, Mizoram Planning Board, Secretary, Planning & Programme Implementation, Finance leh Head of Department te an tel a, sawihona hun tha tak an nei a ni.