3628/2024-2025
Dated Aizawl The 20th December 2024 Zirtawpni: Parliament Winter Session neih mek ah Mizoram Rajya Sabha MP Pu K.Vanlalvena zawhna te Union Minister pathum in chhanna an pe a. Manipur chungchanga a zawhna erawh Home Minister-in chhanna a pe thei lo thung a ni.
Mizoram chhim tawp leh Bay of Bengal tuifinriat kal pawhna tura kawngpui sial mek KMTTP Road project ah kumin November thla thlengin cheng vaibelchhe 356 hman ral a nih tawh thu te, KM 109 laih tur ah KM 70 a thui laih mek a nih thu te, KM 20 lei laih hna (Earth work) zawh a nih tawh thu te leh July thla 2025 a zawh hman tura ruahman a nih thu Union Minister of State for External Affairs Pu Kirti Vardhan Singh an Pu Vena zawhna a chhang a. Mizoramah Oil leh Natural gas zawn chhuahna hna thawh mek a la ni em tih Pu Vena zawhna chu Union Minister of State for Petroleum Pu Suresh Gopi chuan chhangin Mizoram chu Block thumah thenin ONGC leh Vedanta Company ten an la thawh mek thu a sawi bawk a.Union Minister of State for Commerce and Industry Pu Jitin Prasada chuan Indo- Myanmar ramri ah leh Indo- Bangladesh ramri ah te insumdawn tawnna te nau Border Haat din a la nih loh thu in Pu Vena zawhna a chhang bawk a ni.
Parliamentary Committee on Railways meetingah Pu Vena chuan Bairabi to Sairang rel kawng siam mek ah chhungkaw 6 te hnenah zangna dawmna pek an la nih loh avanga Guwahati High Court Aizawl Bench in pe tura order a chhuah tawh hnuah pawh Railway lamin kan la pe lo reng chu diklo a tih thu a sawi chhuak bawk a.Sihhmui a Rel Station Platform siam hna leh Sairang Kurung chunga Railway bridge siam hna thawh lai te chu contractor ten an thawh muan thu meeting member te a hriat nawn tir leh bawk a ni.
