Parliamentary Secretary Pu S. Laldingliana chu tunlai hian chhimlamah zin in Lunglei ah a cham mek a. Vawiin khan IWMP Project hnuaia Lunglei leh a chhehvel a hmasawnna hrang hrang hnathawh mek te a hmun ah kalin a tlawh kual a ni.

Parliamentary Secretary chuan Thaizawl a Pavillion sak mek te, Bualte khua a Lonei mi leh kuthnathawktute thlai thar chhuah dah khawmna Kudam sak mek te, Hrangchalkawn a kawngpui tlur thum inhmuh khawmna hmun - Areopagi tia hming an vuah cheibawl mek te leh Theiriat veng Market shed hna kalpui mek te chipchiar taka tlawhin vawiin khan a enkual hlawm a ni.

Parliamentary Secretary chuan kar kalta Inrinni ni 17.12.2011 pawh khan Lunglei khawpui chhunga veng pakhat Salem veng in day an hman chhim in vantlang pungkhawm hma ah fuihna thu a sawi a. Veng inlungrual leh thawhhona tha tak nei Salem veng mipuite chu an tangrualna chhunzawm zel turin a chah a sorkar an tawiawm that thin avangin lawmthu a hrilh bawk. Pu S. Laldingliana hian Inrinni kalta vek khan Lunglawn khelmual bula Health Sub Centre leh thawktute in tur hmun a en bawk a, Lunglawn a Upa Pawl inkhawmnaah a tel bawk a ni.

A hun hman dan duanlawk ang chu Parliamentary Secretary hian ni 21.12.2011 hian Mualcheng South khaw bul a Thlisam ram a tlawh ang a. Helai hmun hi thlawhtheihna tum hmun tur atana en tawh leh a hmun hma pawh remchang hle a hriat niin Parliamentary Secretary hian Engineer thiam leh sorkar mi pawimawh te hruaiin an enchiang leh dawn a ni.