Vawiin chawhnu khan FCS&CA
Parliamentary Secretary Pu TT Zothansanga hovin Ramrikawna FCI kudam bulhnai a buhfai phur truck park thin avanga motor veivak a tihbuai chungchangah FCI Area manger office-ah meeting neih niin, motor in
hung te chu a hmunah enfiah a ni a. Hei hi September ni 12, 2016-a Supply Minister hova meeting lo neih tawh bawhzuina a ni.

Parliamentary Secretary Pu TT Zothansanga chuan kum 20 dawn liamta a FCI kudam sak anih khan mipui tana harsatna siamlo tur ang bera khaw pawn a hun a ni a, amaherawhchu khua thang zel ah tunhmaa hnawk ngailo khan harsatna a lo siam tak avangin hmasawnna mil a rorel a ngai thin a ni, a ti a. Meeting hmasa bawhzui a truck park theihna tur hmun ruat te chu a aia rem zawka siamthat ngai a nih chuan SP Traffic lamin thu an chhuah thuai tur thu te sawiin, Pu TT Zothansanga chuan he kawngin a nghawng zual bik te – MZU zirlaite, Tanhril leh Tuivamit khawtlang, FCI leh Truck driver leh neitute chuan an harsatna leh mamawhna theuh inhriatthiam tawn a pawimawh thu a sawi a. Mizoram Sorkar chuan FCI chungah a duh ang ngawtin thu a va neih theih loh rualin FCI hotute pawhin mipui harsatna hre reng chunga thui tak hriatthiamna an nei chu lawmawm a tih thu a sawi bawk.

Meeting-ah hian MZU zirlai leh thawktuten University panna kawng FCI kudam bulhnai kawngpui sira  truck in park avanga traffic jam nasa tak a siam thin thu te, hemi harsatna tiziaawm tura hmun hla zawk leh zau
zawka truck park na tur ngaihtuah te, buhfai phurchhuak tur ten hun rei tak FCI kudam kawt a ding lovin ‘release order’ an hmuh dan ang mil zela FCI pan dan tur ruahmanna te sawiho a ni.

Vawiin meeting-ah hian Aizawl Traffic SP Pu C. Lalthanmawia, FCS&CA Department hotute, FCI hotute leh Mizoram University chhunga zirlai pawl leh hnathawk pawl hrang hrang pali (MUNTSA, MIZUTA, MZUSC, MURSA) intelkhawm Joint Action Committee, Tuivamit leh Tanhril Local Council hruaitute leh Mizoram Truck Drivers’ Association aiawhte an tel a ni.