Mualthuam North leh a chheh vel khaw pahnihte chawm tur buhfai dah khawlna Godown cheng Nuai 120 chuang senga FCS&CA Dept. sak chu vawiin chawhnu khan FCS&CA Minister Pu John Rotluangliana'n a hawng. 

He Godown hi NABARD scheme hnuaia Warehouse Infrastructure Fund atanga sak a ni a. Mualthuam North Godown hi Buhfai quintal 3500 dah theihna tur a ni. Hei bakah hian Staff quarter Store Keeper leh Chowkidar chenna tur chu Horticulture Minister Pu PC Lalthanliana'n a hawng bawk a ni. FCS&CA Godown hawn takah hian nakum January thla thleng daih tur buhfai dah lawk a ni. Hawnna inkhawm Mualthuam N' Community Hall a neih Pu H. Lalrinpuia DCSO Lunglei kaihhruaiah hian Khuallian Pu John Rotluangliana  chuan thu sawiin State dangah chuan Food security dawngte bak chu ration la an awm ngai lova, Mizoramah chuan ration a innghat kan tam avangin a theih ang angin mitinin kan dawn theih turin hma kan la mek a ni. Hetih lai hian mizote hi rinawmna tlakchham lai kan nei thin a, nau piang an awm hlekin chaw pawh a la ei theih hmain birth certificate nen ration dawng nghal turin kan phi chung thin a, kan in enfiah a ngai hle a ni, a ti.  

 Khualzahawm Pu PC Lalthanliana pawhin Mualthuam khua chu an vanneih thu sawiin Godown nei thei lo tura ruahman tawh an nei let leh chu a lawmpui tih sawiin a khaw miten mahni ta a ni tih hria a dimdawih taka enkawl turin a chah a, Horti hmalaknaa Centre of Excellent Mualthuam N bul lawka bun mek pawh rei loteah a chhawr tangkaitu an nih theih tur thu a sawi bawk a ni. 

Vawiina FCS&CA Godown mualthuam N a hawnna inkhawmah hian Pu Lalramnghaka FCS&CA Director pawhin Godown sak dan report pein, Mualthuam 'N VCP PC Lalchhawnkima pawhin lawmthu sawiin a khar a ni.