Nimin (15.9.2016) chawhnu dar 3:30 khan Sialkal Range Development Council (SRDC) meeting vawi 5-na chu Ngopa SDO (Civil) Office Chamber-ah neih a ni a, SRDC Chairman, Lengteng bialtu MLA Pu H. Rohluna, School Education Minister, in a kaihruai a. Member-te an telkim vek a, Champhai DC aiawhin Champhai SDO (Sadar) in a telpui bawk.

Meeting kaihruaitu, School Education Minister Pu H. Rohluna, SRDC Chairman chuan abik taka sawrkarin Sialkal tlangdung a ngaihsak chu lawm nachang hriat a tul thu sawiin ngaihsak manhla tak ni tura fund pawh rem hre tak leh tha taka hmang turin member-te a chah bawk.

Meeting-ah hian SRDC fund hmanga hnathawhte thlirlet a nih hnuah kum 2016-17 chhung atana SRDC fund cheng nuai sawmnga hmanga hnathawh tura rawtna te thlirho a ni. SRDC huam chhunga khaw paruk - Mimbung, Hrianghmun, Teikhang, Kawlbem, Selam leh Vaikhawtlang VCP ten an khaw tana rawtna an neihte Meetingah hian an sawi lang a. Rawtna hrang hrangte chu fund awmzat leh khaw mila mumal khaikhawm turin Member Secretary, Ngopa SDO (Civil) chu ruat a ni bawk.

Meeting hian sawrkara fund dil belh a remtih rualin Mimbunga SRDC Office sak rawtna chu fund a la beitham deuh avangin a hnawl rih bawk.