Nimin (15.9.2016) khan School Education leh Industries Minister Pu H Rohluna chuan Ngopa Jubilee Hall ah Agriculture Department hnuaia 3rd leh 4th Phase NLUP tanpuina 2nd installment NLUP beneficiary 114 te hnenah cheng nuai 22.72 a sem.

Khuallian School Education Minister Pu H. Rohluna, Lengteng bialtu MLA chuan NLUP dawngtute chu fuihin a dawngtu hmasa hlawhtlinpuilote an inchhir tawh a ni, a ti a. NLUP chu ruahmanna fel tak nen installment hrang hranga thenin a dawngtute hnenah sem zel a ni a, sawrkar chuan a thlenna tur dik takah a thlen a, a hlawhtlinna chu a dawngtuteah a innghat a ni tih sawiin NLUP dawngtute chu chhungkaw intodelh nana hmang theuh turin a chah bawk. Minister chuan lo neih tihmasawn tura sawrkar hmalaknate tarlangin NEDP hmangin hralhchhuah tham thar tur te, mipui hriselna atan leh zirna tihhmasawn nan te sawrkarin hma a la zel dawn a nih thu sawiin mipuite chu thawhpuiah a sawm bawk.

Ngopa a NLUP semna Inkhawm hi Ngopa SDO (C) Pu V. Lalruatliana’n a kaihruai a. Champhai District Agriculture Officer Pu RK Nithanga’n report pe in Agriculture Department hmalakna hrang hrang a tarlang a, Champhai District Agriculture Department in kumin buhseng zawh veleh NEDP hnuaiah purun sen ching tura hmalakna kalpui mek thu a tarlang a, NLUP dawngtute chu buh tharchhuah a pun ngei thei nana tanla turin a sawm bawk. Pu Lalchharliana, SDAO, Khawzawl in lawmthu sawiin hun a khar a ni.

Nimina NLUP sem hian Ngopa, NE Khawdungsei, Khawkawn, Chiahpui, Teikhang, Hrianghmun, Mimbung leh Lamzawl khua te a huam a. NLUP 3rd Phase ah beneficiary 73 awmin 4th phase ah beneficiary 41 an awm thung.  NLUP dawng, NLUP beneficiary 114 zinga 112 chu WRC I & I hnuaiah niin Rs. 20,000/- theuha sem a ni a. Fu chin thlang chhungkaw hnih te hnenah Rs. 16,000/- zela sem a ni bawk.

Champhai District ah hian Agriculture Department hnuaia NLUP dawngtu 1st phase ah 920, 2nd phase ah 1231, 3rd phase ah 756 leh 4th phase ah 353, avaiin beneficiary 3,260 an awm tawh a, cheng vaibelchhe 31 chuang tanpuina semchhuah tawh a ni.