Chief Minister duh dan angin vawiin chhun dar 12 khan CM Conference Hall ah Parliamentary Secretary Pu Lal Thanzara hovin PWD Officer te chuan an hnathawh mek te thlirletna an nei. He meeting ah hian Principal Secretary, PWD, E-in-C PWD bakah PWD senior officer te chu Joint Secretary leh Deputy Secretary te nen an kal kim hle.

PWD hian anmahni hna bil bakah Department hrang hrang te project, a bikin building construction te an sak sak a, chungte chu an hmasawn dan (progress) leh project thenkhat hmasawnna duh anga chak lo te sawihona hun an hmang a, chak zawka hnathawhte kalpui dan tur hrang hrang an ngaihtuah ho a ni.

Parliamentary Secretary Pu Lal Thanzara chuan PWD chu hmasawnna infrastructure ruhrel khawihtu ber an nih angin an lakah pawh mipuiin beiseina sang tak an neih thu officer te chu a hrilh a, department dang hna chi hrang hrang an thawhsak thinte chu department lamin a dinhmun leh thlen chinte hriat an chak ve thin thu te sawiin chiangkuang taka kan hrilhfiah zel a pawimawh a ni, a ti. PWD senior officer te chu uluk taka project hna te chu vila enkawl (supervise and monitor) turin a chah a, quality chungchangah leh a hun taka project te chu zawh tum zel turin a fuih a ni. DPR siam chungchangah pawh design lam ti tu te pawh hma taka ti thin turin a chah. Meeting ah hian PWD-in project hrang hrang an thawh mekte, a mal mala thlirin ngun takin a dinhmun leh hna hmabak awm te an sawiho bawk a ni.

Vawiina PWD hotute meeting ah hian Lunglei High Power Committee Vice Chairman Pu Joseph Lalhimpuia, MLA pawh a tel a, hetiang review meeting hi Chief Minister hova neih leh thuai tura ruahman a ni.