Tukin khan Commerce and Industries Parliamentary Secretary Pu Joseph Lalhimpuia chuan Lunglei Electric Veng-a Branch YMA ten a thlawna ram an pek ah, Agriculture Market sakna tur hmunhma chu enfiah in, khawtlang hruaitute nen inkawmna hun an hmang a ni.

Bialtu MLA Pu Joseph Lalhimpuia chuan Hall sak nan sum hmuh a harsat tawh thu sawiin, Veng hmasawn nan theihtawp an chhuah thu a sawi a. Branch YMA ten ram an pek ah chuan NABARD sum hmanga Agriculture Market cheng vaibelchhe 7 man vel sa tura ruahmanna siam mek a nih thu a sawi a ni. He hmunah hian Agriculture Market bakah Accounts & Treasuries Office, Industries department enkawl tur Weaving Centre, Multipurpose Community Hall leh lirthei dahna tur dah tum a nih thu a sawi a. NABARD hnuaia Consultancy Firm, NABCONS ten DPR an rawn siam thuai tur thu a sawi bawk a ni. Model school chungchang sawiin, Electric Venga Govt. JNM Middle school chu Mizoramah Middle School-a Model School awm chhun a ni tiin, a sak that nan cheng nuai engemaw zat dah a nih thu leh zirlai tam thei ang ber kai turin a lian thei ang bera sak an tum thu a sawi a. Mi harsa zawk ten man chawi lovin school tha an kai thei dawn a ni, a ti. Primary School – I pawh sa tha tura sum dah a nih thu a sawi a ni.

Heng bakah hian Mizoramah school tam tak sa tha turin sum ruahman a nih thu a sawi bawk.

Parliamentary Secretary chuan niminah a bialchhunga Rotlang ‘E’ chu a tlawh a, balu lakna Saibu kawng MLA Fund a laih zau leh thawm that chu a hmunah a enfiah a ni. Saibu hi Rotlang ‘E’ atangin km 10 a hla a ni a, Rotlang ‘E’ leh Lunglei mipui ten balu laknaa harsatna an tawh loh nan kumtinin MLA Fund hmangin thawm that thin a ni.