Vawiin khan Mizo Academy of Letters (MAL) chuan I&PR Auditorium-ah Annual Meeting neiin MAL Academy Award Prof.R.L.Thanmawia hnenah an hlan. He programe-ah hian Labour and Employment Minister Pu Lalrinmawia Ralte chu khuallian a ni.

Pu Lalrinmawia Ralte chuan tawng siam tha a, ti hausa turin thu leh hla lama tui mite an pawimawh a; ziakmite, hla phuahthiamte leh thusawi thinte hian tawng ti hausa turin awmzia an nei thui hle, a ti. Mizote hian mahni tawnga ziak leh chhiar kan neihna a la reilo hle nachungin kan thuziak leh tawng a thang nasa a, chutihrualin internet hmanga thuthehdarhna awlsam kan hman lar em em social media-ah a tawi zawng leh spelling dik lova thuziak kan chin avangin thui tak kan than tawhna hi min ti thuan thu leh ang tih erawh a hlauhawm, Minister chuan a ti a. Mizo thalai tawngkam thiam leh thuziak lama talent nei tha tak tak ten social media hi inunauna, inhmangaihna leh nun dika min kaihruaitu tur thu leh hla tha ziak nan leh literature ti hausa zawnga Mizo irawm chu thuziak tha tak tak thehdarh nan hmang tangkai turin a sawm a ni. Hnam dang lehkhabu tha Mizo tawnga lehlin hlu tak tak kan ngah a, Mizo irawm chhuak lehkhabu, hnam dang tawnga lehlin erawh a la tlem hle a, hemi kawngah hian thu leh hla lama mi thiamten tan lak ngai a ni, Pu Lalrinmawia Ralte chuan a ti bawk.

MAL in kum thum dana a pek thin Academy Award chu Prof.R.L Thanmawia hnenah hlan a ni a. He award hian thuziak leh cheng 10,000 a keng tel. Khuallian Pu Lalrinmawia Ralte chuan Prof. R.L.Thanmawia lehkhabu 'Zanlai Thlifim (Ka Hlaphuahte)' tih chu a tlangzarh nghal bawk a ni.

MAL Annual meeting leh Academy Award hlanna inkhawm hi an President Lalthangfala Sailo chuan a kaihruai a. An pawl Secretary, Treasurer, Thu leh Hla Editor leh Academy Award Committee Secretary ten kawng hrang hranga MAL hmalakna tlangpui an tarlang a. Chawhnu programme chu Vice President Pu C.Chhuanvawra'n kaihruaiin MAL Sr.Adviser Prof.Darchhawna'n thu a sawi a. Sawihona hun hman zui nghal a ni.