Vawiin khan Parliamentary Secretary Pu TT Zothansanga, Champhai North bialtu MLA ni bawk chuan Zote-a District Court sakna hmun tur tlawhin a enfiah. Parliamentary Secretary hi Champhai DC Pu H. Lalengmawia leh CJM Pi R. Lalduhawmi bakah Addl SP, ASO leh DIPRO ten tawiawmin, Zote khawtlang hruaituten an lo dawngsawng a ni.

Court sakna tur hi tuna Zote YMA Park hmun a ni a. Parliamentary Secretary chuan mipuiten kan tangkaipui ngei tur Sorkar hmun pawimawh atana Zote YMA ten an ram an pe chu lawmawm a tih thu a sawi a ni.

Vawiina Court hmun enfiah hi lian leh changtlung taka sak zawh a nih hunah chuan tun dinhmuna thubuai tam tak, District Court ngaihtuah theih chin bak awm te chinfel a nih theih nan court sang zawk thut theihna ruahmanna pawh a la siam zel theih tur thu Champhai CJM chuan a sawi a. Hei hian sum leh tha sen kawngah nasa takin mipui harsatna a sukiang thei dawn a ni.