Sorkar-in Kelkang tanpuina Special Package a siam hnuaia ar vulh thlangtu chhungkaw 19 hnenah tukin zing khan Kelkang Community Hall-ah Champhai AH & Vety Department chuan ar te 50 theuh a sem a, training pek nghal a ni.

Vawiin hun hi Dr. RL Tanpuii, SDVO in kaihruaiin, ar vulh thlangtute hnenah chuan zirtirna a pe nghal a. Sorkar atanga a thlawna dawn a nih avangin enkawl kawngah ngaihthah mai lo turin a chah a. An ran dawn hnu ah thi an lo awm a nih pawhin a thlakna tur pek an nih dawn loh avangin uluk taka enkawl tura chahin, chaw leh tui pek dan tur te, natna laka ven dan tur leh hriattur pawimawhte a sawifiah a. Hriatthiamloh leh harsatna an tawh chuan Vety Office-a thawkte chu engtik lai pawhin biak pawh leh rawn theih reng an nih thu a sawi bawk.

Chhungkaw tin tana Arte 50 sem a nih bakah hian Ar Chaw kg 60 theuh leh Damdawi pek an ni a, Chaw pekna pakhat leh Tui pekna pahnih theuh sem a ni a. Vawiin arte sem hi Kelkang khawtlang hruaituten an enpui a ni.