Pu Joseph Lalhimpuia Parliamentary Secretary chuan vawiin khan Aizawl DC Office bula Education centre sak mek chu a hmunah a tlawh a. Hnathawh chin leh an thawh dan te a enpui bakah  hmabak la awm thawh zui dan tur a enpui a, Parliamentary Secretary hi  School Education Director Pu K.Lalthawmmawia leh Officer dangten an tawiawm.

Parliamentary Secretary hi  Education Centre sak hna thawktu Lushai Engineer-ten an hnathawh dan leh hmabak te an hrilhfiah a. Building sak chhunzawm dan tur an thlirho bawk. Education Centre sak hna hi zawh a nih hunah chuan a bula MZP Office luhna a tihbuai dawn avangin MZP hruaitute nen thiltih dan tur thlirho a ni bawk. Education Centre sak mek hi kum hnih chhunga sak zawh tura ruahman a ni a, building sakna atana a tira estimate chu cheng vbch 8 a ni a, engemawchen sak anih hnuah a tira drawing-a tel lo belhchhah leh tura ruahman anih avangin cheng nuai 150 sen belh leh tura ruahman zui a ni. Education Centre hi chhawng 7 a sang tura duan a ni a, sak zawh huna a pumpui zau zawng tur chu 27,246.25 Sq ft a ni a, tunah hian a sak hna zaa 65 zawh tawh a ni a, a building chhawng sang lai ber tur thlang lam structure chu zawh fel tawh a ni a, chhak lamah zawm belh leh tum anih avangin a tira ruahman aiin sak hun chhung pawh a rei hret dawn a ni.

Education Centre hi School Education Directorate office atana ruahman a ni a, Officer leh staff te awmna tur bakah a chung berah Conference Hall a awm ang a, a hnuai berah leh a kawt DC Office lam atanga luhnaah  motor parking siam a ni dawn a, car 35 vel leh two wheeler 40 vel chu leng thei tura ruahman a  ni.