Vawiin chawhnu khan Mizoram Football Association (MFA) leh Football Players  Association of India (FPAI) te bultuma buatsaih charity football match atanga sum tlingkhawmte chu Sairang YMA Committee room-ah H&FW Minister  leh MFA President ni bawk Pu Lal Thanzara’n Sairang YMA hruaitute hnenah a hlan. 

H&FW Minister  chuan Sairang khawtlangin tuilian vanga chhiatna nasa tak an tawk chu a tuarpui tak zet thu a sawi a. MFA leh FPAI te hmalakna a tanpuina tlingkhawm chu beitham hle mahse a pawimawh ber chu tanpui duhna thinlung hi a ni a; in mamawhte phuhru zo lo mahse a dawngtu tan malsawmna a nih ngei ka beisei a ni, a ti a. Pu Lal Thanzara chuan sawrkar hmalakna vangin Mizoram chuan Football inelna ah hlawhtlinna nasa tak a changa, Sairangah pawh Stadium changtlung tak leh Football Academy pawh din tuma chak taka hmalak mek a ni tiin Sairang mipuite pawhin an chhawr tangkai ve ngei a beisei thu a sawi a ni. 

He hun hi Sairang Branch YMA President Pu R. Lalrindika’n a kaihruai a. Report kimchang Pu Lalhuapliana, Sairang Dinthar Branch YMA President leh Pu Lalnghinglova Hmar, Honorary Secretary MFA ten an pe a. He hunah hian MFA  leh Sairang YMA hruaitute an tel a ni. 

Tuilian tuarte tanpuina Football Charity Match hi July Ni 1, 2017 khan Rajiv Gandhi Stadium, Mualpui ah MFA aiawh Mizoram team leh  FPAI aiawh ten an khel a. Sum tlingkhawm atang hian Sairang Dinthar Branch YMA leh Sairang Branch YMA te chu cheng 50,000 ve ve hlan an ni. MFA te hian CM Relief Fund ah cheng nuai khat an chhung lut tawh bawk a. Kumin tuilian  khan Sairang khua ah hian In luahlai 54 bawr vel a nghawnga, heng zinga 8 chu luahtlak loh, thawmthat ngai a ni a. Hemi bakah hian  huan 100 chuang  tichhiain lawng thahnem tak a len bo bawk a ni. 

Tanpuina hlan anih zawh hian Pu Lal Thanzara chuan Sairanga Primary Health Centre (PHC)  thar sak mek chu a hmunah tlawhin a enfiah nghal a ni. He hunah hian H&FW Minister hi Dr. Lallunghnema, CEO, State Medicinal Plant Board/ Directorate of Ayush in a tawiawm a ni.