Vawiin chawhnu dar 1:00 khan Parliamentary Secretary leh MFA President ni bawk Pu Lalthanzara’n Lunglei District Football Association (LDFA) buatsaih First Division leh Second Division League season ending a hmanpui.

Parliamentary Secretary chuan Lunglei District in hma a sawn na hmuh tur tam tak a awm chu lawmawm a tih thu a sawi a. Mizoram hmun danga la awm lo Lighting System tha tak Thuamluaia Mual a lo awm ta chu Chief Minister, Sports Minister leh HPC Vice Chairman te inpekna leh thahnemngaihna a ni a ti. Tun dinhmun ah Serkawn Stadium Rs.20 crore a bul tan tur chu detailed project report (DPR) nen sawrkar laipui ah chak taka buaipui mek a nih thu a sawi a. Rs.17crore senga sak tur State Sports Academy, Zobawk a bul tan turin chinfel a ni tawh a ti. Sawrkar in infiamna a buatsaih hi infiam miten Mizoram tih hmingthat nan hmang se tih hi sawrkar leh Mizo mipuite duhdan a nih thu a sawi a. Kum 2011 a kum bithliah hrang hrang a Mizo tlangval 13 India aiawh a football khelte aia tam Mizo thalaiten India tan thawh chhuah leh kan tum tur a ni a ti. North East Premier League nakum a neih hman tum a ni a, hei hi Mizo thalaite tan in pholanna hun remchang a nih thu a sawi bawk.

Pu Lal Thanzara chuan FIFA buatsaih tum India rama Football Coaching Academy hmun atan Mizoram thlan anih chu Mizo naupang leh tleirawl te tan vanneihna a ni a ti a. Mizoram ah pawh MFA leh Zonet te chuan MFA Premier League Rs.25 lakhs. senna tur inremna June ni 13 ah an ziak dawn niin a sawi a. He inremna ang chuan Zonet in MFA Premier League atan kum tin Rs.5 lakhs kum 5 chhung atan a theh chhuak dawn a ni. Parliamentary Secretary chuan Mizoram ah State dang ten an awh ngawih ngawih Artificial Turf Football Field puitling hmun 3 ah kan nei thei hi kan Chief Minister leh Sports Minister te inpekna a nih thu a sawi a. Thalai te tana infiamna khawvel thar siam saktute chungah lawm nachang kan hriat a pawimawh in kan thil neih te pawh kan hman tangkai a ngai a ni a ti.

LDFA ah hian First Division ah team 6 awm in League match hnuhnung ber chu nimin ni 5.6.2012 ah khelh a ni a. He division ah hian Zobawk GSA chu Champion niin vawiin a khelh tur Second division final ah hian College veng GSA leh Vanhne GSA te an in tum a ni.