Ni 25.4.2016 a khelh tan Lungdai Zone Football MLA Running Trophy kharna inkawm chu nimin khan bialtu MLA Parliamentary Secretary Pu Hmingdailova Khiangte hovin Lungdai khelmualah neih a ni.

Pu Hmingdailova Khiangte chuan infiamna kawng hrang hrangah zofaten hma kan sawn nasa hle a, football ah phei chuan India ram pumah hriathlawh kan lo ni ta hi sawrkar hmalakna leh mipui tawiawmna vang a ni, a ti. Lungdai Zone a thalaite fuihin insumtheihna, mahni in thununna leh teirei peihna an neih phawt chuan hma bak eng tak an nei a ni tih hre tur leh chutihrual vek chuan talent nei tha tak pawh nise, ei leh in, zuk leh hmuam, zu leh sa a insum thei lo, taimakna tlachham a, a tawp tlan thlen hmaa beidawng mai thinte tan erawh beisei tur a awm lo tih hre turin a chah a ni.

MLA Running Trophy ah hian a vaiin team 34 in an khel a. Hmeichhe Football ah team 4 telin Nuihiau FC, Lungdai an champion a. Mipa kum 12 hnuai lam inelna ah team 6 chhuakin Academy ‘B’ an champion a. Under 16 boys ah LFC Lungdai champion in senior team ah MMFC Lungdai an champion thung.