Ni 30.4.2016 khan Mizoram Youth Commission in (North East) India hmarchhak thalaite tan DoNER sum hmanga training heng course hrang hrang - Aviation, Hospitality, Travel & Tourism, Retail Services leh IT Enabled Services a a buatsaih mek hawnna hun hman a ni.

Training hawnna inkhawm hi MYC Training Hall, New Secretariat Complex, Khatla Aizawlah neih a ni a, inkhawm hi Pu T. Sangkunga MLA, Chairman Mizoram Youth Commission uapna hnuaiah neih a niin khuallian ah Pu AM Singh, Jt. Secretary, Ministry of DoNER hman a ni. Khuallian hian thusawiin India hmarchhak thalaite hi kawng tam tak ah India ram ril zawka thalaite aiin an tha zawk nia a hriat thu a sawi a, amaherawh chu, mahni inrintawkna an tlachham deuh a hriat thu sawiin India ram mai bakah Foreign thleng pawha hlawhtling thei an nih avangin mahni inrintawkna nei tura fuih pahin NE thalaite tana MYC in training a buatsaih chu a hawng nghal a ni.

Hemi ni hian State hrang hrang Mizoram, Manipur, Nagaland, Sikkim leh Assam atanga trainees ten an hnam lam leh zai te an entir in hemi hnu hian chawhlui kilho nghal a ni.

Khuallian hi Pu T. Sangkunga, Chairman, MYC ruahman angin Pu Lalsawta, Finance Minister a chenna inah hmuhpui a ni a, hetah hian thil pawimawh chi hrang hrang sawiho a niin Skill Development lama MYC in hma an lo lak tawhna ah Finance Minister hian lawmthu a sawi rualin hmalak zel dan turte sawiho a ni bawk.

Tarlan tawh angin MYC in NE thalaite tana training a buatsaih mek hi Ministry of DoNER sum a buatsaih a ni.

MYC buatsaih Skill Training hawnna neih anih rual hian Training Hall - Institute of Skill Development & Capacity Building chu Pu T. Sangkunga, MLA, Chairman MYC in a hawng nghal bawk a ni.

Hemi ni vek hian Pu T. Sangkunga Chanmari YMA Hall-a Vaphai Insuihkhawm Pawl (VIP) in General Assembly an neih chu khuallian niin a hmanpui a, VIP ten chhiatni thatni a an khua te an lo tuamhlawm thinna ah lawmthu a sawi rualin tanla zel turin a fuih nghal a ni.