Sawrkar thil pawimawh buaipuia New Delhi-a cham mek Commerce & Industries Parliamentary Secretary Pu Joseph Lalhimpuia chuan Mizoram chhim lama Tlabung leh Bangladesh insumdawntawnna atana Integrated Check Post (ICP) nei tura ruahmanna kal mek chu bawhzuiin nimin khan Union Minister of state for Home Pu Kiren Rijiju chu a office-ah a hmu.

External Affairs Ministry-in Bangladesh  chu he lai inkalpawhna siam dan tur kawngah hian Home Ministry kaltlangin a dawr a, Bangladesh sorkar chuan nikum December thla tir lam khan Joint inspection  neih nise tiin a rawt a, hei hi a remchan loh avangin Mizoram sorkar chuan thla leh April thla tirah joint inspection hi neih ni se tiin sorkar laipuiah rawtna a thlen a ni. 

Union Minister of State for Home Pu Kiren Rijiju chuan insumdawntawnna hi ram pakhat chauh tih theih a ni lova, Bangladesh hian thapui an thawh ve loh chuan awmzia a nei dawn lova, keini erawh chuan theih tawp kan chhuah dawn a ni a ti. 

Integrated Check Post chungchangah hian Home Ministry nen indawrin Bangladesh pawh biak a ni tawh a. Tlabung atanga Kawrpuichhuah panna tur 19 KM a thui chu laih mek a ni a, Union Minister of state for Home hi kum 2015 pawh khan Mizoram-ah a lokal a, Bangladesh nena insumdawntawnna tur Kawrpuichhuah chu a hmunah a tlawh a, hemi tum hian Pu Joseph Lalhimpuia hian a lo tawiawm tawh a ni.