Vawiin chawhma dar 10:30Am khan District Playground, Siaha Vaihpi-ah Lyuva Khutla-2017 chu ropui leh urhsun taka lawm a ni.

Vawiin a Lyuva Khutla hmanna-ah hian Pu N. Chakhai, Additional Deputy Commissioner, Siaha District, Siaha chu Azipa (Kut Pa) a ni a, Pu C. Thahe chuan Hlado chhamna a nei hnua Pu V. Zacho, Executive Secretary, MADC leh Lyuva Khutla Organising Board Chairman nibawk chuan mipuite chawnglawmna thu a sawi hnuah, Azipa (Kut Pa) Pu N. Chakhai chuan Kut Puanzar pawtpharh in he Kut hi a hawng a ni.

Kut Pa Pu N. Chakhai chuan thu sawiin, he Kut kan hman hian kan Pi leh Pute hunlai min hriatchhuahtir a, mi rethei leh mi awmthei te pawhin he Ni hi hlim leh inlungrual takin an hmang thin a, hmeithai leh fahrate tan Ni hlimawm ber a ni thin a ni, a ti a. He Kut hi Mara fate tan Ni chhinchhiah tlak tak a ni a, hmasawnna chikhat a nih bakah he Kut hian kan hnam min tihchianga, Mara fate min huikhawmtu a ni, ati bawk. He Ni hi inthianthatna Ni, in hmangaihna Ni a ni a, mi zawng zawngin in hmangaih leh hlim taka he Kut hi hmang theuh turin a chah bawk a ni.

He Kut lawmna-ah hian Mara Thyutlia Py (MTP) Branch 7 (pasarih) atangin Hnam Lam hrang hrang an entir bakah YMA Siaha Group leh YLA Sub. Hqrs. Siaha ten hnam lam an entir bawk. MTP Branch 9 (pakua) atangin Hnam Incheina (Custom Parade) hmuhnawm tak entir niin Zaithiam tak tak te zai ngaithlak a ni bawk.

He Kut lawmna chikhat atan Lyuva Khutla-2017 Chhivaw leh Khydi (Miss & Mister) thlanna neih a ni a, Lyuva Khutla Miss atan Nl. Anita Khaimeichho, College Vaih leh Mister atan Tv. K. Parmen, New Colony te chu thlan an ni a, Best Costume Hmeichhia ah Marry Thlyutha leh Best Costume Mipa ah A. Raymond te chu thlan an ni bawk. Pu N. Chakhai, Azipa (Kut Pa) chuan lawmman semna hun hmangin, Pu V. Zacho chuan lawmthu sawinain vawiin Lyuva Khutla-2017 lawmna hun hi a khar a ni.