Tourism changtu Parliamentary Secretary Pu TT Zothansanga chuan vawiin khan travel agency thar CMS Holidays, Sikulpuikawn, Mission Vengah a hawng a. Israel zin duh tan vawiin atangin booking a tih theih nghal a ni.

Pu TT Zothansanga chuan sakhaw dang betu leh hnam dang ten an sakhaw hmunpui an ngai pawimawh a, Muslim te phei chuan an dam chhungin vawikhat tal Mecca tlawh an tum thin a. Kristian kan nih anga Mizo te kal chakna leh kan lunglen bertu Israel ram fan theihna remchang CMS Holidays ten an siam hi a lawmawm hle a ni, a ti. Parliamentary Secretary chuan CMS Holidays te duhsakna a hlan a, Mizote tan man tlawm zawk leh awlsam zawka ram dang kan fan ve theihna remchang siamtu tangkai tak an nih a beisei thu a sawi.

CMS Holidays in a tum ber chu Mizoram mipui a tam thei ang ber ram pawn an zin theih nana hma lak a ni a. Simons Holidays, Mumbai nena thawk dunin ram danga zin theihna tour package hrang hrang siam an tum a ni. A hmasa ber atan Holy Land Pilgrimage Tour chu November thlaah neih a ni dawn a. Jordan, Israel leh Egypt ramte ni 11 chhung an tlawh ang. Booking ti duh tan Rs. 1,24,500 sengin November thla atan bik booking tih tan theih a ni.