Khawvel pum in vawiina United Nations International Day of Older Persons (UNIDOP) a hman rualin Mizoramah pawh Mizoram Upa Pawl Gen. Hqrs hmalakna in hmun hrang hrangah Upate Ni hi hman a ni a. Health Minister Pu Lal Thanzara chuan Electric Veng MUP Rûn building sak thar hawngin, a lawmna hun inkhawm a hmanpui bakah Chanmari Veng leh Chanmari West MUP Unit ten Upate Ni lawmna inkhawm an buatsaihah te a telpui bawk.

Minister Pu Lal Thanzara chuan tunlai khawvel hi thalaite khawvel tia sawi theih hial a ni tawh a. Amaherawhchu upa te hi khawtlang, kohhran leh sorkarah tangkaina tam tak an nei a, an tawnhriat atang te in kum lama naupang zawkte chuan zirtur tam tak kan nei a ni, a ti a. Sorkar pawhin upate pawimawhna hi hriain Committee hrang hrangah MUP-te hi hmaih an nih loh thin thu sawiin, Health Department pawhin hriselna enkawlna kawngah upaten hamthatna an neih theih nan hma a lak thu a tarlang a. Lunglei Hospital-ah upate tan bik liau liau khum 10 dah a nih thu sawiin, Aizawl Civil Hospital-ah pawh Geriatric Ward cabin 10 awmna tur tunah a siam hna kalpui mek a nih thu leh, heng cabin te hi peihfel a nih hma a upa te tan hman lailawk tur cabin pakhat ruat a nih tur thu Health Minister chuan a sawi a ni.

Minister Pu Lal Thanzara chuan MUP kan nei hi Mizoram kan vanneih thu sawiin, ram changkang zawkah chuan an mithiamten mihring nun pumpui an zirchian hnu in mihring nunah chuan upat hun hi ngaihpawimawh a tulzia hmuchhuakin, upate chu intelkhawma, activity hrang hrang an neih a tangkainate an hmuchhuak a. Mizoramah chuan a taka hmuh leh hman mek MUP kan nei a ni, a ti a. Kan upate pawimawhna hrelo a upate zah nachang hrelo thangthar kan ramah pawh an tam ve tial tial a ni tiin Minister chuan inngaihhlut a inzah thiam turin hma lak zel a tul thu a sawi a. Upate atangin zir tur tam tak kan neih avangin an theihna leh thiamna te chu chawlhtir mai lova, hmang tangkai zel turin leh thawhpuiah Pu Lal Thanzara chuan a sawm nghal a ni.

Electric Veng MUP Run hi Electric Veng branch YMA te chuan an veng Golden Jubilee lawmna puala Electric Veng MUP ten YMA Hall a flat pakhat an pekah sak a ni a. Building sak tanpuina atan hian Minister Pu Lal Thanzara leh bialtu MLA ni bawk chuan MLA Fund atangin cheng nuai 5 a pe a. Hri bakah hian member leh tlawmngai ten sum leh tha an thawh bawk a ni. Electric Veng-a hun hman zawh hian Health Minister chuan Chanmari Hall-a Chanmari MUP Unit hun buatsaihah leh Chanmari West ah te Upate Ni lawmna hun a hmanpui leh a ni.