Vawiin khan Parliamentary Secretary Pu Joseph Lalhimpuia chuan Zobawk-a PHC sakna tur hmun a tlawh.

Zobawk 'S' VC Treasurer Pu C. Biakkima kaihhruai inkhawmah Pu Joseph Lalhimpuia chuan Chief Minister Pu Lal Thanhawla duhsaknain a hun takah PHC sakna tur pek an nih avangin, Bialtu MLA a nihna angin lawmthu a sawi a. Health Minister  Pu Lal Thanzara leh Health Minister hlui Pu Lalrinliana Sailo  te hmalakna zarah khawtlangin a mamawh em em PHC chu reiloteah sak tan a ni dawn a ti bawk. Zobawk-ah hmasawnna hrang hrang thawh a ni tawh a, hmabak tam tak la awm phuhruk turin hmalak zel a ni ang, a ti. Mizoram sum leh pai dinhmun siamtha turin Handloom-ah tanlak tum a nih thu sawiin Pu Joseph Lalhimpuia chuan Ministry of Textiles Secretary-in tun hnaia Block 3-ah Handloom dinna tur rawtna sorkar laipuia a thehluh zingah Zobawk pawh a tel a, chuvangin Village Council ten hmathlir nei a, ram ruak neih a pawimawh tur thu a sawi. Zirna lamah pawh tan la thar leh turin leh zirna tibahlah zawnga khawtlang thiltih awm lo se a duh thu a sawi bawk.

Lunglei CMO Pu VLMS Dawngliana pawhin thu sawiin PHC neih chu Zobawk tan rahbi thar a ni a, theih loh tura ngaih tawh PHC thar chu Bialtu MLA hmalakna leh thahnemngaihna vang a ni a tiin lawmthu a sawi a. Pu Maipa, EE, PWD Building Divn. pawhin kumin March ni 29 khan Zobawk-a PHC khum 10 sak phalna cheng 1,26,75,800/-  sanction a ni a, 400 sqm chhunga sak tura ruahman a ni dawn tih a tarlang bawk.

Hemi hnuah Pu Joseph Lalhimpuia chuan a bial chhung Ralvawng-a 'Ui Lui Agriculture Project' en turin a hmunah a kal nghal a, Lunglei DAO Pu J.Rothanga leh EE, Irrigation Pu L.Malsawma Hauhnar ten an tawiawm a ni.