Law &Judicial, Education, Higher & Technical Education leh Parliamentary Affairs changtu Parliamentary Secretary Pu Chawngtinthanga chu vawiin khan Electric Veng YMA Hall-ah ropui taka vui a ni.

Chalfilh bialtu MLA Pu Chawngtinthanga vuina inkhawm hi sorkar leh kohhran programme a then hran a ni a. Sorkar programme hi chawhma dar 11-ah tanin Home Minister Pu R. Lalzirliana’n a kaihruai a. Mizoram Chief Minister Pu Lal Thanhawla, Mizoram Legislative Assembly Speaker Pu R. Romawia, Education Minister Pu Lalsawta bakah MNF Legislature Party aiawh Dr R. Lalthangliana, MLA, ZNP President Pu Lalduhawma, MLA leh Col. Lalchungnunga Sailo, MPC aiawh ten thu an sawi a. Chief Secretary Pi L Tochhong chuan sorkar sunna gazette thuchhuah a chhiarchhuak a ni.

Chief Minister Pu Lal Thanhawla chuan Pu Chawngtinthanga chu mi rinawm, mi hlim thei leh ngainatawm, mipui rawngbawl chu Pathian rawngbawlna ropui tak anga pawm tlattu a ni, a ti a. Mi thiam, lehkha zir sang leh mi thluak tha niin amah atang hian entawn tur tam tak a awm a, Mizoram tana ngaihtuahna tam tak senga a hmathlir thui tak a hnutchhiah chu amah awm tawh lo mah se, Zoram hmasawnna atan kalpui zel a nih tur thu Chief Minister hian a sawi a ni. Hunlo taka Pu Chawngtinthanga vuiliam a lo tul ta mai chu pawi a tih thu leh uihawm a tih takzet thu sawiin a chhungte, thiante leh amah ngainatute mai bakah Mizoram pum tan channa nasa tak a tling a ni, a ti.

Speaker Pu R. Romawia pawhin kum 3 leh thla 9 Mizoram Legislative Assembly member nia Pu Chawngtinthanga’n mipui rawng a bawl dan tlangpui a tarlang a, mi tumruh, nasa taka beia hmalam pan zel mi a ni, a ti. Dan lama mi thiam, tawn hriat ngah tak a nih avangin Assembly House-a Bill sawihona leh dan siamna kawngah a khaipa ber, midangte finchhuahtu a nih thin thu a sawi a. Pu Chawngtinthanga’n Assembly House-a a thusawi hnuhnung ber chhiar chhuakin hunlo taka a boral ta a uizia Speaker chuan a sawi a ni.

Minister Pu Lalsawta pawhin a thawhpui Parliamentary Secretary Pu Chawngtinthanga hunlo taka a boral ta mai chu a uizia sawiin Department-a a thawhpui te tan chuan an zikpui a tliak ta ang hiala a ngaih thu a sawi a. Mi zaidam leh dawhthei, hna thiam em em leh fing tak, Mizoram tana a ngaituahna leh tha leh zung tam tak lo seng tawhtu Pu Chawngtinthanga vuiliam a lo tul ta mai chu pawi a tih takzet thu a sawi a ni.

Pu Chawngtinthanga hi Pu Tawnliana (L) leh Pi V.L. Hliri (L) te fapa niin Phuaibuang khuaah 1.3.1942 khan a lo piang a. Sielmat Christian College atangin 1969 khan BA tha takin a zovin 1973-ah Jorhat Post Graduate Training College ah BT zovin sawrkar hna thawk chungin LLB a zo leh a. 1969 atanga 1983 thleng Phuaibuang High School Headmaster hna thawkin 1983-ah Addl.Sub.District Magistrate hna a thawk tan a. Judicial Officer hna thawka Mizoram hmun hrang hranga a awm kual hnuin 2008, October ni 1 khan Voluntary Pension-in a chhuak a. Kum 2008 MLA inthlan khan Indian National Congress Party Candidate niin Chalfilh Constituency atanga thlan tlin a ni a. Tunah hian a nupui Pi Zohlimi leh a fate pathum a kalsan a ni.

Parliamentary Secretary Pu Chawngtinthanga vuina inkhawmah hian Aizawla awm Minister, Parliamentary Secretary leh MLA an tel kim hle a, sorkar mi pawimawh leh amah uitu mipui thahnem tak an pungkhawm a ni. Sorkar puala vuina neihzawh hian Electric Veng bialtu Pastor K.C. Vanlalduha’n thlamuanna thuchah sawiin Parliamentary Secretary hi a vuiliam ta a ni.