PHE etc Minister tawiawmtu Parliamentary Secretary Pu H.Zothangliana chuan Mamit District-a PHE, Industry leh Tourism hmalakna hrang hrang enin May ni 26 leh 27 khan Kanhmun tlangdung leh West Phaileng-te a tlawh a, nizan hmasa khan Aizawl a rawn lut leh a ni.
Pu Zothangliana chuan May ni 26 khan Mamit-ah Tourist Lodge sak belhna tur enpuiin PWD official-te nen a sak dan tur an sawiho a. Hemi ni vek hian Tuidam-a Tourist Lodge dinna tur hmunhma enin Tuidamah hian National Highway a luhna tur bula hmunte chu Tourist Lodge din nan a remchan zawk leh zawk loh te Tuidam khawtlang hruaitute leh official-te nen an thlir nghal bawk a ni. Kanhmun thleng thla-in Parliamentary Secretary chuan YMA-in Tripura nena inkalpawhna an dan chahna lai tlawhin thil awmziate police leh YMA-te nen an sawiho a, YMA lam chuan zangnadawmna an phut pawh a tlem emaw a tam emaw Tripura sorkarin kut tuartu-te a pek phawt chuan kawng an dan chah chu hawn nghal an tum thu an lo hrilh. Kanhmunah hian Tourism Department-in Tourist Lodge an sak belh mek pawh a enpui nghal a ni.
May ni 27 khan Kanhmun atanga lo letin Pu Zothangliana chuan Bungthuama Industries department lamin Bamboo Chipping Unit din nana in engemawzat an lo sak tawhte chu a hmunah enin hman tangkai dan turte Industries Department officialte a sawipui a, Mamit-ah lut chho lehin sorkarin Mamit-a PHE Division kum 2007-a a lo din tawh tih phuisui dan tur PHE official te a sawipui.
Parliamentary Secretary chuan a rawn haw lamah West Phaileng a tlawh kual nghal a, he khua-a Tourist Lodge lo awm tawh tih zauhna tura ram lei belh ngai chingfel nghalin West Phailenga Tourist Lodge sak belh dan tur te PWD officialte nen a hmunah hian an sawiho nghal a ni. Pu Zothangliana hi PWD Chief Engineer Pu Duhsaka, Tourism Director Pu Vabeiha Hlychho leh official dangten Aizawl atangin an tawiawm a ni.
