Vawiin hian Lawngtlai a Central YLA Hall-ah Parliamentary Secretary Pu H. Zothangliana chuan MPSC Exam Centre, Lawngtlaia dah thar chu a hawng.

Thusawiin Pu H. Zothangliana chuan kum engemawzat liam ta atang tawh khan Lawngtlai khawpuia MPSC Exam Centre dah ve hi kan lo suangtuah tawh thina, thuneitute hnenah pawh kan lo thlen tawh thin, mahse Exam Centre nei tur hian tehna mumal tak a awm avangin chuti maia neih theih a ni biklo va, tehna hrang hrangte chu tlin ve an ngai a ni. Mahse vawiin niah chuan chung thilte chu tihhlawhtlinin a lo awm ta, hei hian Mizoram sawrkarin Lawngtlai bial mipuite a ngaihsak zia leh a duhsak zia chiang takin a tilang a ni a ti.

Exam Centre hawnna a kalkhawm zirlai rualte fuihin Parliamentary Secretary chuan; tunah chuan MPSC Preliminary Exam chu mahni inlum atanga hmachhawn theih a lo ni ve dawn ta a, he remchanna hi hmang tangkai tur chuan zirlaiten taima taka an beih a tul a ni, degree sang tak nei hna hmuhloh chhuanlam atana Politician duhsaktu neiloh vang a insawi thin te hi engemaw chenah an dik a nih pawhin mi taima leh tumruh, thiam fal thei khawpa zir nasa te chuan hna hi an la hmu thei renga; chung mite chhuanlam chu ‘Taihmakna’ chiah hi a ni thin a ti a, zirlaite chu taima taka lehkha zir sauh sauh turin a fuih a ni.

Parliamentary Secretary hian he hun hmang tura lokal zirna in pathum, Government Region Higher Secondary School, South Heat Academy leh Government Lawngtlai College te chu Football leh Volley Ball pakhat theuh a pe bawk a ni.

Pu V. Zirsanga, CEM LADC pawhin thusawiin hun rei tak ata tawh sawrkar hna lian exam turin kan thalaiten hmun dang an pan thina, mikhual ni chungin exam an bei thin. Chuti chung pawhin mi engemawzat an lo hlawhtling tawh nghe nghe a, tunah chuan mahni inlum atangin exam an bei ve thei dawn ta a hei hi helai bial tan hmasawnna mellung pawimawh tak ani a ti a. LADC sawrkar leh mipuite aiawhin Mizoram sawrkar chungah lawmthu ka sawi a ni a ti bawk.

MPSC member Pu Lalbiakthanga Sellai pawhin thusawiin Exam Centre chu sawrkar leh kan hotute zarah hawnin a awm ta a, he centre hlawhtlinna erawh hi chu Lawngtlai District mipuite kutah a innghat a ni. Exam nei tur hian thawktu mi tam tak mamawh an nih avangin sawrkar hnathawk zawng zawngte thawpuina pawh kan mamawh dawn a, inhawng taka min thawhpui zel MPSC chuan a beisei tlat dawn a ni a ti.

MPSC Jt. Secretary Pu Vanrambeiseia pawhin thusawiin MPSC kalphung leh Exam kalpui dan a sawifiah a, zirlai kalkhawmte pawh fuihin MPSC Website tlawh thin tur leh ruahmanna mumal tak nei chunga lehkha zir turin a fuih bawk.

Centre hawnna inkhawm hi Lawngtlai District Bawrhsap Pu J. Hmingthanmawia’n a kaihruai a, a ni hian MPSC Exam Centre atana thlan ber chu Government Region Higher Secondary School a nih thu tarlangin Exam Centre changtlung tak a nih theihna tura thil tul apiang chu theihtawp chhuaha tih a nih zel tur thu a sawi bawk.

He inkhawm hi Lai Student Assiciation Preisent Pu K. Thansiama’n lawmthu sawina (vote of thanks) a neih zawhin tihtawp a ni ta ni.