Varanasi a Mizo awmte tlawh tura nimin a Aizawl chhuahsan, Chief Minister Pu Lal Thanhawla chu Kolkata Mizoram House ah Pu Gautam Makhopadhaya, India Ambassador to Myanmar chuan hmuin, inkawmna hun tha tak an hmang.

Chief Minister leh Ambassador te hian kum 2009 a Central Team in India leh Myanmar insumdawn tawnna hmun tur Zokhawthara Land Customs Stations peih fel vek tawh an tlawh tuma Union Commerce Minister leh Myanmar Commerce hotu tangkawpin hawng se tia rawtna an siam tawh, kum li ral hnu pawha hawn loha la awm reng chu fello an tih thu an sawidun a.Hawn thuai anih theih nan atul ang bawhzui nise an ti a.India Sorkar leh Myanmar sorkarin Rih leh Tidim inkar motor kawngpui siam turah MoU an ziah tawh leh sum senso tur pawh sanction tawh chu fur ruahtui tlak hma ngeia hna bultan an duh thu an sawi bawk a.

Zorinpui Land Customs Stations (LCS) sakna tura Central sorkarin Rs.57 Crores a ruahman leh a satu atan NBCC ni tura ruahmanna kal mek pawh sawiin, Union of Myanmar pawhin an ram lam border ah LCS sa bawk se tia rawtna thlen thaa an hriat thu te an sawi a, Kaladan Multi Modal Transit Transport Project chungchang pawh an sawi bawk a ni.

Ambassodor Pu Gautam Makhopadhaya hi vawiin khan Aizawl lo thlengin Pu R.Romawia Minister, Higher & Technical Education leh Pu Lal M. Dingliana, Chief Information Commissioner, Mizoram State Information Commission te a hmu a. Naktukah Champhai tlawhin Zokhawthar a Land Customs Station a tlawh nghal bawk ang.