Association For Voluntary Blood Donation (AVBD) huaihawt, Valentine’s Day puala thisen pek runpui “Blood For Your Valentine” chu vawiin khan Govt. Mizo HSS Hall, Macdonald Hill, Aizawl-ah neih niin, Pu TT Zothansanga, Parliamentary Secretary chu khuallian a ni.

He thisen pek runpui hawnna inkhawm hi Dr. Lalmalsawmi Sailo, Principal Director, MSACS in a kaihruai a. Khuallian Pu TT Zothansanga chuan hmangaihna lanchhuah tir nana rawng sen hman a ni ang a, chumi milh chiah a thisen rawng nen inchawih taka Valentine’s Day-a blood donation camp Association For Voluntary Blood Donation-in an huaihawt chu ropui a tih thu leh zawngchhang tlak a tih thu a sawi a. Mizo nuna ropui ber fo chu thian chhan thih ngam a nih thu sawiin, damlo mangang te hman tura thisen pe tura kal khawm thalaite chu chhuanawm a tih thu a sawi a, hei hi zo nun ze mawi lanchhuah tir zeltu a ni, a ti. Thalai te chu an nun kawng zawh mek a duhthlang theia an awm laiin, kawng dik tak zawh tur leh nun thianghlim taka hmang turin a chah a ni.

Kum 2010 khan Nl.Zikpuii chuan Valentine’s Day pualin Aizawl Civil Hospital Blood Bank-ah thisen pek runpui a lo huaihawt a, mi 146 laiin thisen an pe a. Kum 2011 khan AVBD nen tangkawpin a huaihawt leh a, mi 350 laiin thisen an pe a ni. Kum 2012 atang khan AVBD leh MSACS bul tumin Valentine’s Day apiangin Blood Donation Camp hi huaihawt a ni ta a. Thupui atan Zikpuii lo vuah tawh sa “Blood For Your Valentine” chu hman chhunzawm zel a ni.

Vawiin hian Aizawl Civil Hospital leh Synod Hospital blood bank a thawk ten thisen hi a mamawh apiangte hman turin an la a.

Vawiin hian mi pathum; Blood For Your Valentine bultumtu a ngaih Zikpuii, Mizo hmeichhe zinga thisen pe hnem ber, thisen vawi 33 zet pe tawhtu Rebecca Saimawii leh Mizo mipa zinga thisen pe hnem ber, thisen vawi 53 zet pe tawhtu C.Lalremruata; te hnenah chawimawina hlan an ni.