Ni 19th September, 2014 (Zirtawpni) khan Mizoram Polytechnic, Lunglei chuan an campus-a Multi-purpose Hall-ah ‘Freshers’ Social’ an hmang a, Parliaentary Secretary Pu H.Zothangliana chu Khuallian niin Mizoram Polytechnic Lunglei Principal Er. Dr. B.Lalhmuakluaia chu Khualzahawm a ni.

Freshers’ Social inkhawm MPSU Vice-President M.S.Dawngkima kaihhruaiah Khuallian Pu H.Zothangliana chuan Mizoram Polytechnic chu sorkar bakah ram leh hnam tan zirna lamah a thawh hlawk hle a, mithiam hmasa engemawzat chu Polytechnic atanga zirchhuak an ni a, sorkar pawhin a chhawr tangkaite zinga mi an ni, a ti. Khawvel hmasawn zelah technical lama mithiam mamawhna a sang zel a, chuvangin Polytechnic zirlaite chuan theihtawp chhuahin an zirna lamah rilru leh tih takzeta thiamna chhar thei tur bei turin a fuih a ni. Sorkar Laipui chuan Rashtriya Uchata Siksha Abhyan (RUSA) kaltlangin ‘preparatory grant’ Cheng Vaibelchhe 3 a pe a, Higher & Technical Education tihhmasawn nan hman mek a nih thu leh RUSA hnuaiah tho Cheng vaibelchhe 55 la dawn tur atangin Mizoram Polytechnic-te pawh thuamthat thuai a nih tur thu a sawi. RUSA hmangin Degree Course zir theihna turin Mizoram Polytechnic, Lunglei chu hlankai tum a ni bawk, a ti. Parliamentary Secretary Pu H.Zothangliana chuan Mizoram Polytechnic Lunglei hman atan Computer Set 1 a pe nghal a ni.

Khual zahawm Er. Dr. B.Lalhmuakluaia pawhin zirlai tharte fuihna thu sawiin kumina Polytechnic Lunglei-a lut thar chu mi 110 an nih thu a tarlang a ni.