Nimin (8th December, 2015) zing khan Pu Joseph Lalhimpuia, Parliamentary Secretary, Trade & Commerce Department chuan Saikhumphai Border Haat hmun tur tlawhin, Myanmar atanga Border Trade atan hmalakna te sawi tura lo kal te nen inkawmna hun a hmang a ni.

Saikhumphai Border Haat din tur hi India leh Myanmar insumdawntawnna tura bordar haat sak tur pali zinga pakhat niin, Chief Minister hmalakna hnuaia kalpui a ni a. Meeting-ah hian Saikhumphai-ah hian Zohnahthlak khaw 5- Leilet, Singai, Jongte, Chhiptlang leh Haimual atang te in khawtlang hruaitute an kal a.

Parliamentary Secretary chuan ram pahnih insumdawntawnna hlawhtling tak nei turin theihtawp hma lak zel a nih thu a sawi a. Border haat chu tih hlawhtlin vat a nih theih nan Sorkar laipuiah pawh Mizoram chuan thu a thlen sak tur thu leh, Myanmar lam pawhin theihtawp a tan lo la zui turin a chah a ni.

Tiau lui chunga India leh Myanmar inkalpawhna lei siamna tur Saikhumphai kaiah hian en nghal a niin, he border haat hi hawn a nih chuan Chin Hills State khawpui Hakha chu 50 km velin a hnaih phah dawn a ni.

Nimin vek khan Parliamentary Secretary hian Vaphai Branch YMA kum 70 tlin lawmna leh Sport hawnna-ah khuallian ni in a hmanpui a ni. Pu Joseph Lalhimpuia hi Trade & Commerce Department atangin Pu HD Lalrintluanga, Jt. Director leh Officer thenkhat te bakah School Education Department atangin Addl. Secretary Pu Lalzirmawia Chhangte ten an tawiawm a.

Champhai atangin Pi Lalsiamliani, DPC (SSA); Pu Lalhminghlua, Deputy DPC leh Pu Hualrikhuma, Deputy DPC (RMSA) ten an tawiawm a ni.