Vawiin khan Minister Pu PC. Lalthanliana hovin Thiltlang khawtlang chuan ‘Model Village’ an nih lawmna hun ruai nen ropui takin an hmang a, hun hmasa lamah Thiltlang Model Village a taka tihhlawhtlin a nih theih nan lungphun a hawng hmasa a ni.

Lawmna hun Thiltlang YMA Hall-a neih, Thiltlang VCP Pu K. Lalruata kaihhruaiah hian thu sawiin Pu PC Lalthanliana chuan Thiltlang khawtlang tan chuan ni chhinchhiah thlak tak a ni a, a bial chhungah Model Village nih duh hian khaw tam tak chuan nasa takin dil mahse Thiltlang khua chu kawng engkimah midangte tana entawntlak an nih theih beiseiin thlan an ni, a ti. ‘Model’ tih laiah hian khawtlangin a tih ve tur tam tak a awm a, hmasawnna ruangam chu sorkarin a rawn ti zel ang a, a pawimawh ber zawk erawh chu a khawchhung mipuite an ni tiin sorkar hmalakna a awm ang ang chu theihtawpa thlawp turin Thiltlang mipuite a sawm. Model Village-in a kentel tur nia a hriat khawtlang hruaitute chauh ni lo, NGO leh prominent citizen te telna committee din a that thu sawiin chu chuan theihtawp chhuaha hma an lakna kawng a ti awlsam a, school-ah naupangte hnena zirtir te, YMA leh Kohhran thleng pawhin anmahni zawn theuha inzirna pek a tul dawn a ni, a ti. Minister chuan Model Village hi politics-a inchirh thehna atana hman tur a ni lova, kan zavaia kan tih tur leh mawhphurhna a ni a ti a, a kaihhnawih department lam pawhin a hma thei ang bera hma la turin a ngen bawk a ni.

He hunah hian District Officer hrang hrang Lunglei leh Hnahthial atangin Line Department te an tel a, Lunglei Civil Hospital Mobile Medical Unit ten Free Clinic nei nghalin, CMO Dr. VLMS Dawngliana hovin Dr. SR. Ngurchamliana, MD, Dr. R. Lalsanglura, ENT, Dr. C. Lalhlimpuii, NCD, Dr. C. Vanneithanga, Dental leh Dr. Johny Lalmuanpuia Tlau, RCH ten dam lo 180 vel an en a, hetah hian X-Ray leh Thisen test pawh tih nghal vek a ni bawk.