Vawiin khan Health Minister Pu Lal Thanzara chuan AIKO buatsaihin Central Jail-ah Advance Christmas Programme a hmanpui.

Pu Lal Thanzara chuan lung in tangte chu an tan chhan eng vang pawh ni se beidawng lo a beiseina nung nei turin a sawm a. Hun rei tak lung in tak Tirhkoh Paula pawhin tan in atangin Pathian a fak a, a rawng a bawl sak a, mi tam tak tan malsawmna a ni ang khan an ni pawhin Pathian an rin chuan an tan puite leh anmahni enkawltute tan malsawmna an ni thei a ni, a ti. Lal Isua pian dawna vantirhkohvin mi tin ta tur chanchin tha lawmawm em em a rawn thlen kha an ta a ni a, chhandamna kan tana a buatsaih hi an chan tur a ni tih hriaa beiseina thar nei tur leh Krismas leh Kumthar lo thleng tur hi hlim leh lawm taka hmang turin Minister chuan duhsakna a hlan a ni.

Minister Pu Lal Thanzara hian lung in tangte hnenah Krismas thilpek cheng 50,000 a pe.

AIKO buatsaih lung in tangte tana Advance Christmas programme hi Pu K.Lawmthanga, DIG Prison Dept.in a kaihruai a. Bible chhiarchhuak mi 63 te hnenah Bible Society of India, Aizawl Auxilliary buatsaih certificate bakah lawmman hlan an ni a, AIKO hian an pawl aiawhin thilpek an hlan bawk. Inmates te aiawhin Prisoner Welfare Committee (PWC)-a an Finance Secretary in thu a sawi a, Kristian Tlangau Editor Rev.K.Lalpiangthara’n hunserh hmangin Dawrpui Venghthar bialtu Pastor R.Lallianpara’n malsawmna sawiin hun hnung a khar a ni.

AIKO tih thumal hi Japanese tawng atanga lak niin ‘hmangaihna’ tihna a ni a. Mi thahnemngai intelkhawm ten pawl anga dingin hmun hrang hrangah rawng an bawl thin a. Jail-ah mimal leh a huhovin, an mamawh dan a zirin counselling te an pe a, an case ah pawh tanpui an ngaih chuan an tanpui thin.