Vawiin  khan School Education Parliamentary Secretary Pu Joseph Lalhimpuia hovin School Education Department leh PWD hotute chuan Aizawl DC Office bula Education Centre sakna tur chu a hmunah an tlawh.

Pu Joseph Lalhimpuia chuan hun rei loteah Education Centre sak theih a ni dawn ta mai chu Department tan thil lawmawm tak anih thu a sawi a, building sakna atana thil tul chinfel ngai ang angte chu School Education leh PWD ten chinfel thuai a tul thu leh tuna building hlui luahtu DEO leh SDEO te chu an awmna tur zawnfel thuai tul a tih thu a sawi a. Education Department-in Education Reform Commission tihhlawhtlinna atana rawtna NEC-a a thlen chu Mizoram project zingah ngaih pawimawh tura dah a niin, phase II ah dahsak a nih thu leh Phase II ah hian ECCE leh thingtlang lama teachers quarters turte propose a nih dawn bakah Lunglei-a Education Complex sakna tur vbch 13 chu NEC in an rawn sanction sak tep niin a sawi bawk.

Education Centre sak thar tur hi cheng Vbch 8 senna tur a ni a, Special Plan Assistance atanga sak a ni dawn a ni.  DEO office bakah SDEO pahnih Office atan hman theih a ni dawn a. Video Conference hall leh conference hall pangngai te leh Library te awm tura ruahman a  ni a, car 40 leh two wheeler engemawzat dah theih a ni dawn a ni.

Vawiin vek khan Pu Joseph Lalhimpuia hian Mizorama School awm zawng zawng Map hmanga awlsam tea an chanchin en zung zung theihna tur School Mapping IT Dept. ten an buatsaih mek chu a hmunah a tlawh bawk a, He School Mapping hi zawhfel anih hunah chuan Mizoram chhunga school tinte chanchin kim chang naupang an neih zat te leh zirtirtu thawk mekte dinhmun te a en theih dawn a, he School Mapping atan hian Google Map hman a ni. Tunah hian School data remfel leh thenfai hna thawh mek a ni a, zirtirtu 16,199 rem fel tawh a ni a, zirtirtu 8587 remfel tur a la awm a ni.

 

Attachment

  • Loading attachment...