Vawiin khan Pu Joseph Lalhimpuia, Parliamentary Secretary chuan Mizoram University thuneitute a kawm a, NCTE-in tunhnaia Aizawl leh Lunglei DIET-a B.Ed zirna hawn a phalsak  chungchangah MZU-a Permission leh Affiliation neih dan tur a sawipui.

MZU Vice Chancellor Charge la mektu Prof. Lianzela chu  Aizawl leh Lunglei DIET-a B.Ed zirna hawnna atana thil tulte Pu Lalhimpuia hian telephone in a lo sawipui tawh a, chu chu MZU thuneitute chuan bawhzuiiin Inspection team an din nghal thu Parliamentary Secretary hi  hrilh nghal a ni a. Inspection team te hian an report chu an thehluh hnuah University-a Academic Council-in Permission pek chungchang hi a ngaihtuah dawn a, Permission tihfel a nih hnuah Affiliation buaipui zui a ngai leh dawn tih  hrilh  a ni bawk.

Parliamentary Secretary chuan MZU Vice Chancellor a biakna MZU thuneituten rang taka an lo bawhzui chu lawmthu a sawi a, Mizoramin school hrang hranga thawk turin B.Ed a mamawhna a sang tawh hle tih MZU thuneitute chu a hrilh a, MPSC-in Mathematics leh Science Teacher 111 lakna tur a buaipui mekah pawh B.Ed neiin an daih loh thu leh hetiang a nih avang hian B.Ed zirna Aizawlah leh Lunglei DIET-a tan thuai chu Sorkar a hmanhmawh in a ngaihpawimawh  thu a sawi.

Pu Joseph Lalhimpuia, Parliamentary Secretary hi SCERT Director Pi Laldawngliani Chawngthu leh SCERT Officer dangten an tawiawm a, MZU lam atangin Vice Chancellor charge la mektu Prof. Lianzela leh Prof. Haukhanlian Mate, Director, CDC ten an lo dawngsawng a, inkawmhona hun tha tak an hmang a, MZU thuneitute hian Aizawl leh Lunglei DIET-a B.Ed Class tan thuai a nih theih nan a theih ang anga lo bawhzui an tum thu an sawi a ni.