Pu R. Vanlalvena, ZOHANDCO Chairman chuan intluktlanna ram nuam siam turin ram tana thahnemngai mithiam leh taima an pawimawh thu leh, chumi atan chuan eirukna umbo a tul thu a sawi a; zirlai taima leh thil tha duhte pawimawhzia a sawi. He thu hi vawiina Govt. T. Romana College Silver Jubilee lawmna, Synod Conference Centre, Aizawl a hman naah khuallian niin a sawi a ni. 

Pu R. Vanlalvena chuan Govt. T. Romana College in kum 25 an ding tawh chu lawmawm a tih thu leh, a din tirh atanga zirlaite harsatna hrethiama hma la thintu college an nihna chu fak tlak a tih thu a sawi a. Ram hmasawnna kal zel rualin ram nawmna chu a chhunga cheng mipuite kara intluktlannaah a innghat thui hle a ni tiin, tunlai khawvel a ram hrang hrang dinhmun thlir pawhin mi hausate leh miretheite inkar a zau poh leh ramin hmasawn a harsat thu a tarlang. Mizoramah pawh a nei leh a neilote inkar a zau zual zelloh nan, eirukna leh hlemhletnate umbo a pawimawh thu te, sorkar department hrang hranga hnathawhna tur pawisa lo lut te chu thawktuten phur takin renchem tak siin tha taka hmalak nan an hman a tul thu te leh, ram nghahfak tuna zirlai ni mekte inpekna leh thahnemngaihna pawimawh zia a sawi a ni. Zirlaite chu taima takin zir zela, nawmsakna chu hlawhtlinna daltu a nih lohva, dinhmun chhia leh harsatna nasa tak karah pawh mi tam zawk tluk loh hlawhtlinna hmu thei an awm thin thu a tarlang a. Khuallian chuan khawvel hmasawnna chu chak takin a kal reng zel a: tuna mi nawlpuiin an ngaihtuah chhuah ngailoh thilte pawh kum reiloteah kan nitin nuna bet tlat a lo nih thinna khawvela cheng kan nih avangin hmasawnna mil zelin thalai leh rual u zawkte pawhin dawnsawn dan kan thiam a, ram leh hnam hmasawnna leh thatna tur a nih chuan kan ngaihdante kan her danglam thiam a ngai a ni, a ti. 

Khuallian hian Silver Jubilee puala Souvenir buatsaih chu a tlangzarh nghal a ni. Jubilee lawmna inkhawmah hian hian Principal Dr. Lalrintluanga leh professor dangten thu sawiin, Dr. Malsawmliana Secretary Organising Committee in report a pe a ni. Govt. T. Romana College hian an silver jubilee hi kawmna thawhkhatna chu April ni 6, 2017 khan lo neih tawh a ni. 

Govt. T. Romana College hi kum 1992 a din niin National Assessment and Accreditation Council (NAAC) chuan Grade B a pe a ni. Jubilee pual hian T. Romana College chuan Chite lui tihfai hnatlang te lo nei tawhin, blood donation camp-te buatsaihin thisen unit 170 chuang Aizawl Civil Hospital-ah an pe bawk a. Indian National Fellowship Centre nen tangkawpa “National Integration and Medical Camp” an buatsaih ah Free Medical Camp Tachhip-ah leh Republic Vengthlang ah te lo nei tawhin, anni nen hian Cultural Exchange Programme te neih a ni bawk.