Parliamentary Secretary Pu Joseph Lalhimpuia chuan vawiin khan Union Minister pahnih Pu Santosh Kumar Gangwar, Textile Minister leh Pu Sarbananda Sonowal, Youth Affairs & Sports Minister-te New Delhi-ah a hmu a. Pu Joseph Lalhimpuia chuan Textile Minister hnenah chuan Mizoram Handloom tih hmasawnna tur leh bul tanna tur kawng hrang hrang a sawipui a. Union Minister hian cheng vaibelchhe 18.18 senna tur Handloom Incubation Centre Mizoram-ah unit 3 dinna tur chak taka kalpui anih thu leh hemi atan hian national tender pawh chhuah a nih tawh thu a lo hrilh a. Mizoram sorkar-in a sawmna angin April thla chhunga amah ngeiin lungphum pawh phum hman a beisei thu a lo sawi bawk. Mizoramah hian handloom tih hmasawnna turin cluster approach-a hmalak tum a ni a. Hemi atan hian state sorkar-in cluster 17 a siam te pawh pawm anih thu leh Mizoram tan theihtawpa hmalak a tum thu Union Minister hian Pu Joseph Lalhimpuia chu a lo hrilh a ni.

Pu Joseph Lalhimpuia hian vawiin vek khan Youth Affairs & Sports Minister Pu Sarbananda Sonowal chu a office-ah a hmu bawk a. Pu Joseph Lalhimpuia hian nikuma Prime Minister hnena School Sports Infrastructure tih changtlunna atana a dilte a bawhzui a, School Education-a Division 22 te tan indoor/outdoor sports atana ruahmanna siam turin Union Minister hi a ngen a. Mizorama School te hian infrastructure kan nei lo chungchung pawha National level-ah lawmman kan lak fo thu leh infrastructure neih tha ngat ila chuan India ram infiamnaah dinhmun tha taka ding thei an nih dan te a thlen a ni. Union Minister hian a theih ang anga lo bawhzui a tum thu a sawi.  

Parliamentary Secretary hian Human Resource Development Secretary Pi Vrinda Swarup leh Joint Secretary Pu Rada Chauhan te pawh a hmu a. Secretary hnenah hian RMSA hnuaia India ram puma kumina scheme thenkhat an paih (drop) in Mizorama harsatna nasa tak a thlen dawn avangin ngaihtuah nawn leh turin a ngen a. HRD Secretary hian RMSA Budget a tlem thu hrilhin hemi avang hian India ram pum hrutruala scheme thenkhat tihtawp anih thu leh state mal bik ngaihtuah a harsat thu a lo hrilh a ni.

Kum engemawzat SCERT hnuaia Vocational Education-a harsatna awm te sawiin Pu Joseph Lalhimpuia chuan hemi avang hian state-in hma a lak chak loh phah tih a hrilh a, hei hi a theih ang anga  lo chinfelpui  an beisei thu an sawi a ni.

Pu Joseph Lalhimpuia hi Trade & Commerce & Industry Secretary Pu Zothankhuma'n a tawiawm a ni.