Vawiin chawhnu khan P.Hrangkhuma Hall, Zobawk-ah MZP Branch Zobawk buatsaih 'Students Motivation-cum-MZP Award' chu Khuallian Education Parliamentary Secretary Pu Joseph Lalhimpuia-in a hmanpui a. He hunah hian Zobawk VCP Pu C.Lalbiakkima chu Khual Zahawm a ni bawk.

Students Motivation-cum-MZP Award inkhawm Zobawk MZP Branch Vice-President Richard Lalchhuanmawia kaihhruaiah Khuallian Pu Joseph Lalhimpuia chuan HSSLC leh HSLC-a titha zirlai zawng zawngte lawmpuina leh duhsakna a hlan a. Khawvel thiamna leh hmasawnna chu 'science'-ah innghat a ni a, eng kawngah pawh hmasawnna neih tur chuan science thiamna hmanga thil hmuhchhuah (invention) awm a ngaih thu sawiin Pu Joseph Lalhimpuia chuan tunlai zirlaite chu internet avangin khawvela thiamna chi hrang hrang chungchang leh chanchin thar ber berte pawh an banphakah a awm vek tawh a, chuvangin Mizo zirlaite pawh ramdang naupangte aiin thiamnaah an duai bik tur a ni lo, a ti. India sorkarin 'Look East Policy' hmangin khawchhak ramte nen insumdawnna leh thil dangah te thawhhona kawng a dap mek a, hengahte hian Mizo thalaiten rilru nei taka chhawrtlak ni turin an inbuatsaih chho tak zet a hun tawh a ni tiin zirlai kalkhawmte a fuih a ni. Zirnaah hlawhtling ni tur chuan tumruhna, mahni inthununna leh huaisenna a pawimawh thu sawiin Pu Joseph chuan Zobawk khua chu zirlaite tan duhthusam hmun a ni a, khawtlangin zirna lama tan an lak chu fakin zirlai tithate chuan hun lo kal zelah pawh hlawhtlinna hmu deuh deuh zel a, Zobawk chauh ni lovin, Lunglei District leh Mizoram an ti hmingtha thei a ni, a ti.

Parliamentary Secretary Pu Jospeh Lalhimpui chuan zirlai tithate lawmpui nan Govt. Zobawk HSS hnenah Rs.10,000, Disciple English Medium School, Zobawk hnenah Rs.10,000 leh Govt. Zobawk HS hnenah Rs.5,000 a pe bawk a ni. Vawiina Zobawk zirlai tithate chawimawina hunah hian Pu Joseph Lalhimpuia hi RMSA, SSA, Industries leh I&PR officials ten an tawiawm a ni.