Home Minister leh bialtu MLA ni bawk Pu R.Lalzirliana chuan vawiin khan Thingsulthliah Community Hall-a Thingsulthliah Teachers’ Association (TSA) ten kumin HSLC leh HSSLC Exam-a zirlai hlawhtling te puala chawimawina programme an buatsaih chu khuallian niin a hmanpui.
Pu R Lalzirliana chuan kumina HSLC leh HSSLC Exam a zirlai naupang hlawhtling te chu a thinlung taka a lawmpui thu sawiin an kal zelna turah duhsakna a hlan a. Khawi ramah mah Sawrkar hna in a ram mite a daih lova chuvangin zirlai taima, pass tha leh thiamna tak tak pawchhuak tan chuan Sawrkar hna ah innghat lovin mahni kut ke a dinchhuahna kawng a in hawng reng a ni a ti a. Mahse hlawhtling tur chuan tawrhchhelhna te, tumruhna te leh tei rei peihna te neih a tul tiin hengte hi an zirna kawnga leh an nunah te ngaipawimawh turin zirlaite chu fuih a ni. Mite tana malsawmna ni a, ram, hnam leh khawtlang tana mi tangkai ni turin zirlaite hi a chah bawk a ni.
Home Minister chuan zirlai naupangte chu nawmsak hmasak tum lova hlawhtlinna leh nawmsakna chu harsatna leh rethei hnua a awm chauh ani tih hre reng tura chahin Sawrkar emaw, company emaw pawhin a rawihin mi chawrtlak, rintlak leh rawihtlak ni thei tura an zir zelnaah thiamna tak tak pawchhuak turin a fuih bawk a ni. Pu R Lalzirlaina chuan thatchhe deuh a lehkha zir tan chuan tunlai khawvelah eizawnna a awm tawh lo a tiin zirlaite chu an hun zawng zawng an zirna atan inpumpek turin a hrilh a, an nu leh pate kawng engkima enkawltu leh an mamawh zawng zawng phuhrutu te chu theihnghilh lova engtik lai pawh a duat turin a chah bawk a ni.
Thingsulthliah-ah zirtirtu intelkhawm pawl in an tha leh zung, sum leh pai senga zirlai naupangte hlawhtling te tana chawimawi leh lawmpuina programme buatsaih nachang an hria chu fakawm a tih thu Home Minister hian a sawi. Pu R Lalzirliana hian zirlai hlawhtling te chu lawmpuina thuziak TSA in an buatsaih chu a hlan bawk a ni.
He lawmpuina programme hi Pu Ramngaizuala, President TTA chuan kaihruaiin Major Zodintumi CO in hunserh a hmang a, Pu Laldinthara, Secretary atangin Report tawi ngaihthlak a ni bawk. HSLC Exam a Distinction a passed te chu a hranpa in Thingsulthliah Development Committee, Aizawl chuan lawmpuina thuziak leh sumfai Rs. 1,500 treuh an hlan bawk a ni.
Thingsultliah atang hian kumin HSLC leh HSSLC Exam-ah te hian zirlai 108 an hlawhtling a, HSSLC Exam a I Division a 7, II Division a 13 leh III Division a 29 an passed a, HSLC Exam a Distinction a 4, I Division a 13, II Division a 19 leh III Division a 59 an passed a ni.
Thingsulthliah Teachers’ Association (TSA) hi kum 1969 a khan din niin tunah hian member 89 an awm mek. Thingsulthliah-ah hian sikul 10 a awm mek a ni.
