Nimin khan Parliamentary Secretary Pu K. Lalrinthanga, Serlui bialtu MLA chuan May ni 23, Inrinni tlaia thlipui ina a nuai Phainuam leh Saihapui (V) khua te a tlawh a. Heng khuaah te hian chenna in luahzui tlak loh leh thawmthat ngaite tlawh kualin chhiatna a thlen hi pawi a tih thu leh mahni chenna in chan leh harsatna tawk chhungkua te a tawrhpui takzet thu a sawi.

Parliamentary Secretary chuan senghawi hna leh in chhia te sak that hna thawktu Phainuam Branch YMA te hnenah hnatlang thingpui lum nan cheng 20,000 a pe a, chutiang bawkin Saihapui (V) Branch YMA hnenah Rs. 2000 a pe bawk.

Phainuam ah hian luahzui tlak loh khawpa chenna in chhia 9 awmin chenna in thawmthat ngai 11 a awm a. Saihapui (V) ah hian in chhia 1 leh thawmthat ngai in 5 a awm a. Chawlhni atang khan khawtlang chuan senghawi hna leh in thawmthat ngai in sak hna an tan nghal a, vawiin lamah te pawh an la hnatlang zui a ni.

Kolasib DC-a Disaster Management & Rehabilitation changtu officer leh thawktu te chu Chawlhni May ni 24 khan a hmunah kalin, a theih ang ang in chawldawl hna an thawk a, silpaulin engemawt zat chhiat tawk chhungkua te an hlan bawk a ni.