Mizorama tlawmngai pawl lian ber CYMA kumpuan ‘Ram leh Hnam Humhalh’ chu vawiin khan Vanapa Hall-ah CYMA leh Aizawl Branch YMA hrang hrang hruaitu kalkhawmte hmaah Parliamentray Secretary to Chief Minister Pu Lal Thanzara’n a hawng.

Kumpuan hawnna inkhawm CYMA President Pu T.Sangkunga kaihruaiah Khuallian Pu Lal Thanzara chuan YMA-in kumina kumpuan thupuiah ‘Ram leh Hnam Humhalh’ a vuah chu YMA member-te tan chauh ni lovin, Mizo mipui tan a ni, a ti. Pathianin hnam anga min siam leh ramri min kham sak khawvela kan neih chhun hi Mizote chuan chhunglam leh pawnlam atanga kawng hrang hranga min run thin laka kan humhalh hi kan tih makmawh a ni, a ti bawk. Dan lova ram pawn lam mi sumdawng lo lut mek te, sumdawnna suak siam te, voters ID lama intah luh tumna te, engnge an sumhnar pawh hriat lova hausa thut te, kan ramri dep atang tea kan ram min rawn chuhpui reng mai te, kan ram rohlu thing leh mau min suat sak mek te leh zu leh ruihhlo chi hrang hranga min run mekna atangte hian YMA chauh ni lo, Mizo mipui, sorkar leh kohhran te hian inthurual a, ram leh hnam hi tun hunah hian humhalh nachang kan hriat a ngai tak zet tawh a ni, a ti a. Sorkar leh YMA ten kawng tam takah hmalak hona a neih mek te chu a ropui hle a, tun thal chhovah pawh ram kang awm thei ven kawngah pawh sorkar kut leh ke ber ni leh turin a ngen a ni.

Thu a sawi zelnaah Pu Lal Thanzara chuan rampumah leh ram pawn thleng pawha Mizo hnahthlakte inpumkhatna tur kawnga YMA hmalakna te a chhuanawm a ni, a ti a. Kan chhehvela ram thenawma cheng hnamdangte nena inhmuhmawh palh nikhuaa boruak ti dai zawnga hmalatu CYMA leh Group YMA te chungah lawmthu a sawi bawk a ni. Tunhnaia NLFT ten an rukbo nia hriat Mizo 5 te chungchang sawiin Pu Lal Thanzara chuan sorkar hmalakna bakah YMA pawhin palai tirin boruak muanawm tak nena mi rukbo te hruai kir leh tum a nih thu a sawi bawk.

YMA Kumpuan hawnna inkhawmah hian Thupui sawina hun CYMA Treasurer Pu R. Lalngheta leh CYMA Vice-President Pu Lalbiakzuala ten an hmang a. CYMA General Secretary Pu Vanlalruata’n YMA hmalakna leh dinhmun sawiin tunah hian Mizoram pumah YMA Branch 790 leh Group YMA 46 awmin, a zavaiin YMA-a inziaklut Member 3,88,146 an awm a ni. Nikum lama HPC(D) te tihluihna avanga thiah tak YMA Branch 28 leh Joint YMA Branch 1 chu sorkar nena an inbiak dan zulzuiin CYMA CEC chuan din thar leh turin nimin khan thu a rel a ni. YMA hmalakna avangin Electoral Roll thar berah khua leh tui dik tak Mizorama cheng te chauh electoral roll-a thun an nih theih nan YMA chuan theihtawp a chhuah thin a ni, a ti bawk.