Vawiin chawhnu dar 1:00 khan Chhumliam-kawn, Lunglei hmuna naupang chanhaite enkawlna hmun Bethel Centre kum 10 tlin lawmna programme chu Social Welfare Department Minister Pu PC Lalthanliana’n a hmanpui. He hun hi Bethel Centre Director Pu K.Laltawnga’n a kaihruai a. Tun dinhmun ah he Bethel Centre ah hian naupang enkawltu nei mumal lo 105 te chu worker 6 in an enkawl mek a ni.

Minister chuan mi thahnemngaite zarah mi chanhai leh puitu neilote tan hmun siam sak a ni thin chu Kristian tih tur dik tak a nih thu a sawi a. Mizoram innghahna lungphum 3 te chu Kohhran, Sawrkar leh NGO’s te an ni a. Hengte hian Mizoram hmasawnna turin an tanrual ho vek a ngai a ni, a ti.

Mizoram tan Home neih belh aiin Home a awm ngai lo tura kan nun uluk a pawimawh zawk a. Chu chu kan hmasawnna tur leh kan hmabak a ni tur a ni a ti.

Bethel Centre thuneitute tarlan dan in Social Welfare Deparment Minister hmalakna hian Bethel Centre bula khawpui bawlhhlawh paihna chu sawn a lo ni tawh a. Centre tana Choka sakna turin Rs. 2,00,000/- sumfai in tanpuina a pek bakah Mizoram chhunga Home tanpuina dawngtute zingah he Bethel Centre hi a telve tur thu a lo hrilh a ni. Vawiin khan Minister hian bungraw thenkhat leh infiamna hmanruate a pe tel bawk a ni. Vawiin programme ah hian Pi M. Zohmingthangi, Lunglei Bawrhsap lo ni tawh thin chu Bethel Centre atana a thawh that avangin ‘Bethel Centre Nu’ nihna pek a ni bawk.