Vawiin zing dar 7.00 khan Parliamentary Secretary Pu Lal Thanzara chuan Tennis Court atanga Tuikual Veng kal tlanga Dinthar Veng pawhtu kawngpui siamthat dan tur ke a fangin, a enfiah. He kawngpui hi JNNURM pawisa hmangin siamthat a ni dawn a, sum senso atan hian Rs 49,50,000 ruahman a ni a, tender pawh tihchhuah a ni tawh nghe nghe. He kawng hrula ram neitu Pu Vanramlawma leh Pi Khawlchhingpuii te chuan vantlang tana remchan zawkna tur a nih avangin pawisa phut miah lovin an ram chu kawng zauhna atan sahthlak an remti a ni.

Pu Lal Thanzara chuan, “Vantlang tana mi inphal tak tak an awm thin hi an fakawmin, an entawntlak em em a; khawi hmunah pawh sawrkarin kawngpui siam hna a thawhna apiangah khawtlang mipuiten hnathawktute kan tawiawm thiam a pawimawh hle zel dawn a ni” a ti. Mizoram-a district khawpui chhung kawng zawng zawngte cheina tur JNNURM sum ruahman sa piah lamah Central sawrkarin kawngpui siamna atan liau liauva hman tur cheng vaibelchhe 200 a rawn pek tur thu sawiin Pu Lal Thanzara chuan, “Tun hnaia Chief Minister Pu Lal Thanhawla leh Prime Minister Pu Manmohan Singh te an inkawm tum khan he ruahmanna hi chinfel a ni a. Prime Minister duh dan angin cheng vaibelchhe 200 senna tur ruahmanna chipchiar pawh thawn thlak diam a ni tawh a ni” a ti.

Pu Lal Thanzara hian Tuikual Veng hrang hranga inkalpawhna kawngpuite chu ke-in a fang a; Tuikual CP Road-II leh Khatla inkalpawhna tura kawngpui sial rawtnate pawh a hmunah a tlawh a ni. Tuikual Presbyterian chuan an biak in hnuaia ban pali leh in-hnuai chhukna kailawn chu tih bova vantlang kawng zauhna atana siam an inhuam thu Pu Lal Thanzara hi an hrilh a; PWD lamin he ruahmanna hi an bawhzuisak dawn a ni.

Pu Lal Thanzara hi khawtlang hruaitute bakah AMC Ward 12-na Councillor Pi Zodinsangi leh PWD officer-ten an tawiawm a ni.