Education Minister Pu Lalsawta chuan vawiin chawhnu dar 3 khan SCERT hnuaia zirtirtute training petu DIET leh DRC hotute nen an inhmuhkhawmna ah thusawiin Central Sorkar, Ministry of Human Resource Development (MHRD)-in a phal zat aia tam thawktu 56 hun hmasa lama lak an nih avang leh hun rei tak chinfel a nih loh avanga harsatna namen lo an tawh thin chu pawi a tih thu sawiin, chinfel dan kawng zawnga sawrkarin hma a lak dante a sawifiah a. Heng thawktu hrang hrang 56 te hlawh lak ve theihna tur post dilna central sorkara thlen chu rem an lo tih theih loh dan te, a kawng awm chhun chu DRC 6 - Champhai, Kolasib, Lawngtlai, Saiha, Mamit leh Serchhip te DIET puitlinga hlankai a, sanctioned post lo awm belh ah te heng thawktu chuangte rem fel mai an nih dan tur te leh amah ngeiin central sorkar hotute a sawipui bakah lehkha nena a bawhzui dante a hrilhfiah a. Secretary, MHRD-in Scheme Revised fel a nih veleh tihhlawhtlin tum a nih thu a rawn hriattir thute a tarlang bawk. Tin, Department Secretary leh Officer ten a tul ang ang te chak taka buaipuiin hma an lak mek thute a sawi a, tun atanga hun reilote ah a hlawhtlinna pawh hmuh thuai a inbeisei thu leh a hlawhtlin hunah chuan DIET leh DRC-a thawktu hrang hrang ten hlawh chungchanga harsatna nasa tak an tawh thin te a bo tawh tur thu a tarlang bawk.

Tin, College of Teacher Education (CTE) pawh M.Ed, M.Phil. leh Ph.D. zir theihna turin Institutes of Advance Study in Education (IASE) ah hlankai a nih tawh thu Minister chuan a tarlang a. Heng bakah hian Cadre for Teacher Educator te, post ruak fill-up dan turte leh DIET/DRC Principal hlawh chungchangte, Revised Teacher Education Scheme, 2012 te an sawiho bawk a ni.