Nimin khan Lunglei south bialtu Pu S.Laldingliana, Parliamentary Secretary Pu S.Laldingliana chuan a bialchhung Chawngte 'L' ah Nuai 32 senga sak RMSA High School a hawng.

Hawnna inkhawm hi Pu R.Lalthakima, DEO & DPC, RMSA Mission; Lunglei District kaihruaiin Pu Joseph Lalngaisanga Chhakchhuak, Co-Ordinator RMSA Mission, Lunglei District chuan Technical Report a pe bawk.

Thu sawiin Pu Dinga chuan Chawngte 'L' in RMSA building tha tak mai an nei thei ta chu a lawmpui zia thu te, hemi atana Department thawktute inpekna leh duhsakna avanga a lawm thu a sawi a. Pu Dinga chuan zirlai te fuihna thu sawiin Chawngte (L) RMSA building thar chu ram tana mi chhuanawm leh rohlu chherchhuaktu school duhawm tak ni tura a duh thu a sawi bawk. Pu Dinga chuan, "Zirlaite chu fawmkem dang nei lo va zirna kalpui turin ka duh tak meuh che u a, Tin, zirtirtute pawhin naupangte thiamna haichhuahna kawngah tihtakzetna nena ke in pen ka duh tak meuh a ni" a ti.

Chawngte 'L' RMSA building hi Kum 2011 January thla atanga sak tan a ni. Hemi hnu hian Pu Dinga hian a bialchhung vek Vairawkai khua tlawh lehin he khuaa Sawrkar hmalakna hrang hrang zingah Primary leh Middle School sak lai mek te, Vairawkai Model Village insak lai bakah Khelmual laih hna kal lai mekte a hmunah tlawhin a enfiah nghal bawk a ni.