Mizoram-a SSA leh RMSA hnathawh dan a hmuna endik tura lo kal Joint Review Mission (JRM) chuan Mizoram an chamchilh mek a. Dt 15.1.2013, Thawhlehni tlai khan N.Delhi atangin Aizawl an lo thleng a, zanah Hotel Regency-ah RMSA leh SSA hnathawkte nen an inkawm nghal a, hnathawh dan tlangpui te, Mizoram chu tlangram anih avanga India ram pum kaihhruaina anga kal a harsat dan te leh thil pawimawh chi hrang hrang an sawiho a, meeting hi Pu Lalhmachhuana State Project Director SSA& RMSA in a kaihruai a ni.
JRM hi RMSA leh SSA hnathawhna atana sum leh pai thawhtu World Bank’s International Development Association (IDA) te, United Kingdom’s- Department of International Development (DFID) leh European Union (EU) atangtein an ni a. SSA chu tun tum hi a vawi 17-na a ni tawh a, RMSA tan erawhchuan tun tum hi a hmasa ber a ni. JRM hi kum tin thla ruk danah January leh July thla apianga neih thin a ni a, January thlaah state an tlawh a, July thlaah erawh chuan state tlawh lovin officialte nen hnathawh dan an thlir thin a ni.
RMSA Joint Review Mission te hian State 5 a district pahnih theuh an tlawh mek a, chung an tlawh te chu Rajasthan, Andra Pradesh, Mizoram, Orissa leh Punjab te an ni. SSA Joint Review Mission chuan state 7- Andra Pradesh, Maharashtra, Odisha, Uttar Pradesh, Arunachal Pradesh, Mizoram leh Delhi-a district pahnih theuh an tlawh mek bawk a ni.
RMSA atana JRM lokalte hi Prof. Neelam Sood, Govt. of India aiawh leh Geeta Kingdom, World Bank Development partners te an ni a, Vawiin (Dt 16.1.2013) Nilaini hian Champhai District chhunga school thenkhat tlawh turin an fehchhuak a. SSA atana JRM lokalte Prof. Sadhna Saxena, Delhi University leh Stephen Baines, Consultant DFID te chuan Mamit leh Kolasib district chhunga school thenkhat tlawh turin an fehchhuak bawk.
JRM team te hi Dt 18.1.2013 Zirtawpni-ah Aizawl-ah an lo let leh ang a, zanah an thil hmuh dan te SSA leh RMSA official-te nen Hotel Regency-ah an sawiho leh ang a, Dt 19.1.2013-ah Delhi panin Aizawl an chhuahsan dawn a ni.
