Ni hnih awh tur Trained Nurses Association of India (TNAI) Mizoram Branch Biennial Conference chu vawiin chawhma dar 11:00 khan Synod Conference Centre ah Parliamentary Secretary Pu S.Laldingliana’n a hawng.

Biennial Conference hawnna thu sawiin Pu S.Laldingliana chuan Nurse hna chu damlo mangang, tanpui ngaite tanpui hna a nih avanga hna ropui leh hna zahawm a nih thu a sawi a. Mi dangte tana malsawmna ni tura hmangaihna nen thawk thin turin Nurse kalkhawmte chu a chah. Nurse zirchhuak te chu Sorkar hnaah an luh vek theih dawn loh avangin tawng dang zir tela Mizoram leh ram pawn thlenga hna thawk thei tura inbuatsaih turin a fuih bawk. Falkawna Referral Hospital chu khum 350 awm thei tur leh Medical College din nana Mizoram Sorkarin chak taka a bawhzui mek thu a sawifiah a, Cancer Hospital pawh khum 100 awm thei tura Zemabawk ah buatsaih mek a nih thu te a tarlang bawk.

Vawiin TNAI Biennial Conference ah hian President Pi Ramfangzauvi’n Presidential Address sawiin TNAI pawimawhna leh Nurse dinhmun leh mawhphurhna te a sawifiah a, Vice President Pi Lalbiaksangi’n Conference thupui Clients’ Health Needs : Nurses Concern a sawi a, Secretary Nl Lalfamkimi’n TNAI Mizoram Branch report a pe bawk. TNAI Mizoram Branch ah hian member 1534 an awm mek a ni.