RMSA hnuaia cheng nuai 48.57 senga Vapar Secondary School Building sak chu ni 15.1.2015 (Zirtawpni) khan Parliamentary Secretary leh Champhai North Bialtu MLA ni bawk Pu TT Zothansanga chuan a hawng. He hun hi Champhai District Education Officer Pu C. Rodala, DPC, RMSA ni bawk chuan kaihruaiin, Education Department official te bakah sawm bik dangte an tel a. Vapar Secondary School atang hian Board Examination hnuhnung ber (2015) ah khan zirlai 100% an pass a ni.

Parliamentary Secretary chuan zirlai zawng zawng pass tir thei zirtirtu hnuaia zir mekte chu an vannei a tih thu leh, zirtirtute inpekna chu lawmawm a tih thu a sawi a. Zirna in tha tak Sorkarin a pek chu hmang tangkai a, enkawl zui chu zirlai leh zirtirtute mai bakah Vapar khaw mipui zawng zawngte mawhphurhna anih thu a tarlang a. Zirlai kalkhawmte hmaah chuan MLA Pu TT Zothansanga chuan school luhna hmingthan leh hmingthanloh ai chuan nu leh pa te leh zirtirtute thuawih a, rinawm taka zir chuan hlawhtlinna a thlen zawk thu a hrilh a ni.

Vapar Secondary School hi Project Approval Board in kum 2010-11 khan sakna tur project a pawmpui hnu ah sak tan niin, Classroom pali, zirlai 35 theuh lenna bakah Headmaster office, Teachers' Common Room, Art & Craft Room, Computer Room leh Science Laboratory siam a ni a. Mipa leh hmeichhia tan tiolet hran sak niin, Ruahtui dawnna leh a khawlna tur tuizem ltr 2000 dawng pahnih dah a ni bawk.

He hunah hian Pu Hmangaihzama, Work Manager hnen atangin sak dan thu tlangpui ngaihthlak a ni a, Pu Samuel Lalrinzuala, Co-Coordinator, RMSA chuan technical report pe in, Pu Thangngaihliana, VCP Vapar in lawmthu sawiin hun tawp a siam a ni.