Khawpuia mirethei te tanna chenna in sak sakna proramme Rajiv Awas Yojana (RAY) chungchanga ni hnih awh tur training workshop NLUP Conference Hall-a buatsaih chu vawiin chawhma khan Parliamentary Secretary, UD & PA, etc,. Pu Hmingdailova Khiangte chuan a hawng. He Workshop hi Sawrkar Laipui Ministry of Housing & Urban Poverty Allevation leh Mizoram Sawrkar, UD &PA Department tangkawpte huaihawt niin training programme hi Regional Centre for Urban & Environmental Studies (RCUS), Lucknow in an rawn buatsaih a ni.

Pu Hmingdailova Khiangte chuan Aizawl-ah slum area tih ang hi awm ciah loh mahse khawpui hmun thenkhatte leh state pumpuiah pawh chenna in lamah mi harsa tam tak an awm a, chung mi te chuan he scheme hi UD &PA Department kaltlangin a zar an zo ve theih ngei a beisei thu a sawi. Sawrkar Laipui-in hmasawnna scheme hrang hrang a duan hi Mizoram ang state pachhia chuan kan chhawr hle a ni a ti. He Worskhop-a tel UD&DA hnathawkte leh AMC aiawhte chu training ngaipawimawha, RAY chungchang chu chipchiar leh zau taka zir turin a chah a ni. Rajiv Gandhi Yojana hnuaia peng hrang hrang te, GIS Mapping leh a kaihhnawih chungchang te, DPR siam dan te, Quality Management chungchang te, RAY hnuaia Social Audit chungchang leh RAY hnuaia khawtlang nena thawhho dan chungchangah te training hi pek an ni dawn a. Training-ah hian RUCS mithiam te leh Kolkata Municipal Council-a DG Pu Dipankar Sinha ten zirtirna an pe dawn a ni. Workshop hawnna programme hi UD & PA Director Pu K. Lalthawmmawia’n kaihruaiin RCUS Deputy Director Dr. Rajeev Narayan chuan thuhmahruai a sawi. Rajiv Awas Yojana hi khawpuia slum area a chengte tana chenna tur In ruahmansak na programme Sawrkar Laipui a duan a ni a, June 2011-a tan niin, June 2013 thleng khan in buatsaihna hun atana hman niin 2013 atang hna tak tak chu thawh tan a ni a, 2022 thleng kalpui tum a ni. Hemi atan hian Sawrkar Laipui chuan 12th Plan Period chhungin rampum tan cheng vaibelchhe 32,230 a ruahman a ni.