Geology & Mining Resources Minister Pu H. Rohluna leh Parliamentary Secretary Pu Joseph Lalhimpuia te chuan vawiin khan Maubang leh Thenzawl-a Oil India Limited-in lei hnuai hausakna zawn hna atana Drilling site an buatsaih mekte chu an tlawh. Dr. H. Lallenmawia, Director, Geology & Mining Resources Department leh a hote an tawiawm a, A hmuna hian  Oil India Limited-a Chief Engineer(Civil) Pu Gautam Das leh Senior Geologist C. Laldinkima ten lo dawnsawngin hma an lak mek dan te chipchiar takin an hrilh a ni.

Pu H. Rohluna chuan OIL aiawhte chu an hna kal zel dan tur duanna, copy pe tur leh an thawh chin apiang monthly report pe thin turin a hrilh a. An hnathawh tihkhaw tlaia a awmloh chu a duhdan a nih thu sawiin Pu Rohluna chuan an tihtur apiangte chak taka bawhzui tur leh harsatna an tawk a nih chuan a hnena thlen thin tura hrilhin a tul ang apiangah amahin Centre dawr a ngai a nih chuan a puih dawn thu pawh a hrilh a. Sawrkar chuan an thawh dan leh thawh chin uluk takin a vil dawn a ni, a ti. Minister hian Delhi a zin hmasak berah OIL hotute hmu a, chak zawka hmalak dan tur a sawipui dawn a ni, a ti bawk.

Pu Joseph Lalhimpuia pawhin a theih ang chin china Mizo thalaite hnathawk tura chhawr tul a tih thu a sawi a. Corporate Social Responsibility kaltlangin School Education Department nen thawhho dan kawng dap nise tiin zirlai naupangte tana hamthatna awm thei hrang hrang chu OIL hotute a sawipui tum thu a sawi bawk a ni.

Tun din hmunah ah hian Maubuang Drilling Site-a civil works chu zawhfel anih tawh a, lei verhna khawl drilling rig chu April thlaah bun fel tum a ni a, chumi hnu chuan lei verh hna tan beisei anih thu OIL aiawh te chuan an sawi. Thenzawl-a Drilling Site civil works hna chu za 98 vel zawh anih tawh a, kar leh velah chuan zawhfel beisei a ni a, April hnu lamah chauh lei verh hna hi tan a beisei awm thu an sawi bawk a ni. Heng hmun pahniha lei verh hna thawktu tur company chu thlanfel a ni tawh a, hna an tan vat theih nan OIL chuan a hma a la mek a ni. Oil leh gas a awm nge awm loh tih finfiah nan leihnuai kilometers 4.5 tal verh a ngai dawn a ni.

Maubuang leh Thenzawl bakah hian Oil India Limited hian Keifang, Phulmawi, Darlung, leh hmun dang pahnih (Sialsuk bul leh Hmuifang bul) ah te drilling site hi an buatsaih dawn a, Keifang leh Phulmawi drilling site buatsaih nan hma an la tan tawh a ni.

OIL hnuaia hian heng hmunah te hian Mizo geologist contract a thawk 5 an awm mek a ni.

Thenzawla Drilling Site civil works zawng zawng hi tualchhung contractor JR Construction hian an thawk mek a ni.