Mizoram Sawrkar General Administration Department chuan hetiang hian thuchhuah a siam:- State Level Task Force on Mitigation of Coronavirus (COVID-19) vawiin 21.3.2020 tlai dar 4:30 -a Meeting in a rawt ang leh Council of Ministers-in thuthlukna a siam angin Mizoram Sorkar chuan "The Mizoram Epidemic Diseases (COVID-19) Regulations, 2020"-in thuneihna a pek hmangin COVID-19 laka Mizoram mipuite kan him theih nan a hnuaia thupekte hi ramchhung mipui mimirte zawm turin a tichhuak a ni.

1. COVID-19 Mizorama a lo darh ve lohna tur atan ni 22.3.2020 (Sunday) atangin ni 29.3.2020 (Sunday) thleng damdawi dawr leh nitin mamawh (essential commodities) dawr tiam lovin dawr zawng zawng khar vek tur a ni.

2. Public Transport (City Bus, Sumo, Taxi, Night Bus leh a dangte) service zawng zawng ni 22.3.2020 (Sunday) atanga ni 29.3.2020 (Sunday) thleng tih tawp vek tur a ni. Private vehicle (4 wheeler leh 2 wheeler) pawh tlan chhuah phal a ni lo. Hei hian Ambulance, Fire Service, dan leh thupek kawnga hman lirtheite, accredited journalist leh electronic media-te lirthei leh COVID-19 dona kawnga hman lirthei leh nitin mamawh (essential commodities leh essential services) phurtu leh mipui mamawh enkawlna tura sorkar hnathawk phurtu lirtheite a huam lovang.

3. Mipui mamawh (essential commodities leh essential services) buaipuitute leh medical duty te tiam lovin tual laiah mipui mimir chhuah khap a ni.

4. State dang leh ramdang atanga Mizoram lo luhna kawng zawng zawng khar tur a ni a, hei hian essential commodities phurte leh medical emergency a motor/ambulance tlante a huam lovang.