Covid-19 avanga tawrhna rapthlak thleng thei laka mipuite kan him zawk nan State Level Task Force, vawiina SAD Conference Hall-a thukhawm chuan kar khat chhung Mizoram pumah ‘Partial Lock -Down’ neih turin a rel a. An thutlukna hi Council of Minister ah thlen nghal a ni.

Vawiina State Level Task Force meeting hi Chairman Pu Lalnunmawia Chuaungo, Chief Secretary kaihhruaina hnuaiah neih niin Health & Family Welfare Minister Dr.R.Lalthangliana pawhin meeting hi a telpui a. Covid-19 laka invenna tur leh tawrhna thleng thei ti ziaawm tura hmalakna hrang hrang te sawiho a ni a; mitthi sawngbawl leh vuina programme hman dan tur kalphung te, mitthi lumen leh khawhar lenpui chungchang te, market khar leh mipui veivahna city bus leh transport motor khuahkhirh te, khualzin leh Mizorama lo lut te lo khung hranna leh enzui dan tur chungchang te sawiho a ni a. Covid-19 hrileng meka tuna India ram dinhmun te thlir chungin Mizoram pum huapa sawrkar leh local level a hmalakna hrang hrang te mipuiin thuawih taka kan zawm theihna tur leh hmalakna te a sawt lehzual theih nan kar khat chhung Partial Lock down neih hi State Level Task Force chuan a tulin a hria a. Thil awm dan a zirin hei aia rei pawh Partial Lock-Down hun chhung hi a tul anga pawhsei theih a ni ang. Partial Lock down neih chhung hian sawrkar office te erawh chu khar vek a ni dawn lo va, emergency leh mipui mamawh thil pawimawh bik te pawh a huam dawn lo a ni. State Level Task Force thu chhuak angin vawiin khan Home Department chuan ILP pek chhuah pawh vawiin atanga titawp turin thu a chhuah nghal a ni.

Health & Family Welfare Minister Dr.R.Lalthangliana chuan Covid-19 laka Mizoram kan him theihna tura  sawrkar hmalakna ah kohhran hrang hrang te, Local level task force te, tlawmngai pawl te leh mimal thahnem ngaia inpe te chungah lawmthu a sawi a. Tuna India ram dinhmun ngaihtuahin Mizoram chu tha thlah hman a ni lo a. A bik takin tun thla chhung chu nasa lehzuala theihtawp chhuah chhunzawm turin a ngen a. Mipui te pawh sawrkar hmalakna thu awih taka tawiawm turin a ngen a ni.